WILLEMSTAD.- Abitantenan di e bario Acropolis na Montaña ta spera 3 siman kaba riba Selikor. E último bia ku e trùk di dushi di Selikor a pasa nan bario tabata 2 i 3 di mart. Di e dia ei vários habitante ta yamando Selikor i asta manda mensahe via di Facebook pero sin resultado. Kada bes ta tende ku e trùk ta pasa tal dia pero no ta presentá. Te ku ayera atardi nada di e trùk di sushi di Selikor apesar di e promesanan di parti di e kompania.

Tur esaki ta nifiká ku e sushinan ta akumulando pafó, nan ta trese kakalaka, muskita, raton i tur sorto di insekto mas. Banda di esaki kachónan ku ta kana riba kaya anochi ta basha e sushinan abou i ta kibra e sakunan ku tin poné riba e klikonan pasobra ya no tin lugá mas pa pone sushi di 3 siman largu.

Tambe abitantenan a aserka inspekshon di salubridat pero tampoko a haña resultado. Nan a manda e-mail pa e direktor di e servisio ei.

E abitantenan tin impreshon ku ta kos pa malu Selikor ta besig kuné, pasobra ta pasa tur otro bario pero serka nan no ta bin i no ta promé biaha e situashon aki.

E abitantenan ta basta rabiá i kansá, kansá di e holó, i molèster kantidat di promesa ku no a keda kumplí. Nan ta biba den un bario nobo i dushi pero miéntras tantu el a bira un landfill.