WILLEMSTAD.- E Reunion General di Sosionan (RGS) di ACU, ku a tuma lugá djadumingu, 29 di yüni na Sentro di Konvenshon Sambil, a marka un momento importante den futuro desaroyo di e kooperativa. Den un ambiente positivo i energétiko, sosionan a ekspresá nan konfiansa renobá den maneho i rumbo di e organisashon. A apresiá e struktura transparente i profundidat supstansial grandemente. Hopi a bandoná e reunion ku un sentido di speransa i envolvimentu, algun a sinti esaki for di na mesa di registrashon.

Durante e reunion, gerensia a presentá e Plan Stratégiko nobo 2025–2027, konstruí rònt di kuater balor sentral: Konfiansa, Poder di Komunidat, Sostenibilidat i Inovashon. Sosionan a adoptá e rumbo akí, ku ta sentrá riba stabilidat, relevansia i akshon orientá riba futuro. E strategia ta reflehá e kompromiso di ACU ku un kooperativa formá no solamente pa medio di, sino tambe pa su sosionan, un organisashon kaminda nan por rekonosé nan mes, sinti nan mes skuchá i yuda konstruí futuro aktivamente.

Tambe riba tereno finansiero a splika pasonan importante. Aunke 2024 a terminá ku un pèrdida chikí, e maneho a mustra klaramente ku esaki ta un mehorashon kompará ku e aña anterior. “Nos ta mira señalnan kla di rekuperashon. Konfiansa di nos sosionan i implementashon determiná di nos strategia ta dunando su fruta,” asina Dennial Daal, Direktor Finansiero a bisa.

E reunion di sosionan a suprayá e importansia di un polítika di kobransa fuerte i konsistente. ACU ta hasi un yamada urgente na sosionan ku tin pago atrasá pa tuma kontakto na tempu pa konhuntamente dialogá tokante un akuerdo mutuo favorabel. Kaminda ta nesesario, ACU ta hañ’é obligá pa tuma medidanan mas severo na bienestar di e kooperativa den su totalidat.

Ademas, komo muestra di konekshon i rekuperashon, ACU ta invitá eks sosionan, ku a bai durante añanan turbulento, pa regresá. “Kalurosamente, nos ta invitá nos sosionan anterior pa bolbe forma parti di un ACU mas fuerte, ku mira riba futuro, un kooperativa kaminda konekshon, solidaridat i envolvimentu aktivo di sosio ta fundamental,” asina Eldrid Fos, Direktor Ehekutivo ta afirmá.

Mas aleu a anunsiá nombramentu di Zulaika Mook i Myron Eustatius pa Hunta di Supervishon, fortalesiendo ainda mas e struktura di gobernashon di ACU. Durante di e reunion e komishonnan di Interes Kooperativo, Komishon Fondo pa Hubentut i Komishon Fondo pa Senior tambe a presentá nan esfuersonan hasí durante e ultimo aña, enfatisando asina e kompromiso sosial di e organisashon.