Pa sèptèmber Girobank ta stòp tur servisio

WILLEMSTAD.-EXTRA a tuma nota ku e koperativa di spar i krédito ACU a kuminsá hasi yamada na eks klientenan di Girobank pa asosiá na e instituto. E koperativa ta ofresé no solamente pa habri kuenta pero tambe e posibilidat di hasi fiansa. Den e kuadro aki EXTRA a puntra ACU si akaso ta tur eks kliente di Girobank ta bon bini, tantu klientenan priva komo kompanianan i tambe si por spera ku di e forma aki ACU ta kuminsá operá mas den direkshon di un banko komersial.

E instituto den kontesta na EXTRA ta indiká ku nan a tuma nota ku Girobank mes ta informando su klientenan ku nan ta bai stòp tur servisio bankario entrante sèptèmber di e aña aki. Sosionan di ACU ku alabes ta kliente di Girobank a anunsiá e koperativa ku nan lo saka tur nan sèn i hiba ACU, sinembargo otro konosí i famianan si lo tin difikultat pa habri kuenta koriente serka bankonan lokal. ACU ta enfatisá na EXTRA ku nan ta haña tende spesialmente di grandinan ku ta kobra AOV ku ta sumamente difísil pa habri un kuenta na banko komersial pa sigui kobra nan AOV. Lamentablemente e asosiashon di bankeronan lokal no ta reakshoná riba preguntanan ku ta trata bankonan komersial en general.

Investigashon ku EXTRA mes a realisá a base di informashon publiko riba website di Banko Sentral ta mustra ku ACU komo instituto finansiero ta mas grandi, pa loke ta trata nan kapital, ku algun banko komersial lokal. Sinembargo ACU ta un koperativa di spar i krédito i lisensia ta diferente for di un banko komersial. Un banko komersial mester kumpli ku reglanan muchu mas estrikto ora di otorgá fiansa na hende.

Último añanan ACU tambe mester e enfrentá basta problemanan interno entre su direktiva i otro órganonan vital den e instituto. Banko Sentral tambe a trata pa yuda trese solushon. E problemanan aki no tin nada di haber ku e forsa finansiero di e instituto pasobra manera indiká ariba e koperativa ta asta mas fuerte ku sierto banko komersial. Mas detaye den edishon di EXTRA.

 

LAGA UN KOMENTARIO

Please enter your comment!
Please enter your name here