WILLEMSTAD.-Mundu ta sigui desaroyá i esei ta e kaso ku Corona vírus tambe. Tin notisianan di un vírus di Corona ku a mutuá. Laboratorio nashonal di Kòrsou, ADC ta hasiendo nan tèstnan kaba. ADC ta wardando pa haña informashon si e tèstnan ku nan ta hasi por akapará e ‘modèl’ nobo di e vírus, esta e variante di Corona. Na palabra Lange Virginia-Cova direktor di ADC den deklarashon na EXTRA.

Corona a pèrkurá pa hopi preokupashon rònt mundu i awor ku tin un variante di e vírus e situashon ta bira ainda mas fèrfelu. E direktor di ADC a duna di konosé ku nan tin 3 método ta traha kuné, pero awor mester tèst e métodonan. ADC tin sufisiente kapasidat pa atendé ku e vírus i su kambionan. Nan ta sigui desaroyonan internashonal di aserka den e kuadro aki. Importante ta pa den e tèstnan rekonosé e sekuensia di e vírus pa asina por bring’e. Pa e motibu ei nan mester sa si e tèstnan aktual ta rekonosé e vírus.

Riba e pregunta di EXYTRA si akaso e vírus mutuá ta mas peligroso e profeshonal den kímika a bisa ku no. Literatura sientífiko internashonal ta mustra ku e vírus ku a mutuá por infektá hende mas lihé, pero no ku e ta mas peligroso. E miedu ta pa no bai infektá hopi hende pareu i asina pone preshon riba e sistema di salubridat. Den hospital CMC tin solamente algun kama pa atendé hendenan ku bira hopi malu di Covid. Tene distansia ta algu ku ta keda importante. Kòrda kuida, tanten ta spera pa e bakuna yega.

https://extra.cw/boneiru-no-por-test-pa-variante-nobo-di-coronavirus/