WILLEMSTAD.- Entrante awe djárason 14 di aprel, Analytisch Diagnostisch Centrum (ADC) ta ekspandé su servisio ku un di dos lokalidat na Airopuerto Hato.

Den yanüari último ADC den koperashon ku GMN a habri un Medical Test Area den airopuerto. E sentro di tèst aki ta spesial pa personanan ku a bini for di eksterior i ke drenta nos pais, pero pa un òf otro motibu no tin tur nan dokumentonan na òrdu relashoná ku e Covid-19 tèst ku Kòrsou ta rekerí.

Awor pa fasilitá personanan ku ta biaha pa eksterior; ADC a stashoná su ‘Bùs di Salú’ pafó na airopuerto kaminda e ta ofresé e servisio Covid-19 PCR òf Antigen test (sneltest). Tambe personanan den e área di Hato por hasi uso di e servisio aki ku ADC ta ofresé.

E orarionan ku e Bus di Salú’ ta habrí ta di djaluna pa djadumingu di 12:00pm-19:00pm. E bùs ta situá dilanti e ofisina di TUI na airopuerto.

E Covid-19 PCR test ta kosta ANG 159,- ($90) i e resultado ta keda kla den 24 ora ya komo ku e análisis ta keda hasí den laboratorio.

E Antigen (sneltest) ta kosta ANG 35,- ($20) i e resultado ta keda kla den 30 minüt. E kliente por warda riba riba su resultado i bai kuné mes ora.

Tur hende ta bon biní riba ADC su Bùs di Salú na Aeropuerto Hato. Ta pidi pa tur persona pa registrá promé ku bishitá e Bùs di Salú: www.covid19pcrtestcuracao.com