INGLATERA.- E bos dje kantante britániko, Adele, a bira mas bas esaki debí na e efekto ‘Maskulinashon verbal’, un efekto di embaraso ku por afektá algun muhé.
Algu mas ku 1 aña pasá, Adele a konfesá durante di un konsierto ku su bos a bira mas ‘bas’ durante di su embaraso.
E ‘maskulinashon verbal’ ta un efekto ku por keda provoká durante di e promé embaraso, e ta redusí temporalmente e tono di bos di e mamanan, segun un estudio ku a keda realisá pa investigadornan di e Universidat di Sussex na Inglatera.
Pa por a optené e konklushon aki a graba bos di 600 dama durante di 10 aña, sinku aña promé i sinku aña despues di duna lus. Konforme e análisis e tono di bos ta bira normal despues di mas o ménos 1 aña despues di duna lus.
Un dje investigadónan a splika ku un posibel splikashon di e malesa ta e kambionan hormonal despues di parto.
Despues dje embaraso ta sosodé un kaida di e nivel di hormona seksual lo por tin influensia riba e ‘dinámika’ di e kuèrdènan vokal i e kontròl vokal.