E ke sali fo’i wega di droga pa su nietunan

WILLEMSTAD.- E hòmber Francel  W. (61) tabata awa na wowo, paso e ke yudansa awor si pa su uzo di droga.

E  ta keda akusá pa un kaso di ladronisia den bibienda na luna di òktober aña pasa. El a kibra porta di e kas drenta bai ku vários prenda, telefòn i otro artefaktonan.

Tambe el a bai ku sèn i kolonia .

Durante tratamentu di e kaso, e akusado a bisa ku ta kuadra ku el a  drenta den e kas  i hòrta .

Dado momento el a bira hopi emoshonal i a bisa ku e no tabata su mes na e momento ku el a kometé e ladronisia. Segun e akusado, ta e droga a  pone hasi e kosnan ei.

El a splika ku semper e ta kue su djòpnan pe haña su sèn, pero ora sèn kaba, e ta pèrdè kabes hòrta pa e haña sèn kumpra su droga.

Segun e akusado, tur loke el a hòrta di e señora den e bibienda esaki a haña nan bek.

El a bisa ku e kier a bende nan pa e haña sèn pa kumpra su droga.

Segun e akusado, ora sèn kaba e ta kuminsá kana buska sèn pa kumpra droga. E dia ei el  a sali ku intenshon pa kibra drenta pa e hòrta pa e haña sèn pa kumpra droga.

Wes a bisa ku  e akusado tin un rèkert pa lokual ta ladronisia riba su karchi kastigu.

Tambe el a yega di kai sera na Hulanda pa bolita.

El a bisa ku e ta tata i opa i ke tei pa su nietunan. P’esei e ta kla pa rehabilitá paso e no ke sigui asina mas.

Wes a bis’e ku den pasado a purba yud’e, pero el a bolbe kai. Fiskal a bisa ku si mira bon, ta kasi henter e akusado su bida e tabata tras di trali pa ladronisia.

El a bisa ku aworakí nan ta bai dun’e e último chèns. Segun fiskal e  ta tene kuenta ku edat di e akusado  i  e mester  kuminsá ku tratamentu na Brasami.

E akusado na su turno a pidi e señora víktima despensa i a bis’e ku un dia e lo ke page.

Mirando tur esakinan fiskal a yega na 730 di kual 615 kondishonal.

Wes den su desishon a bai  di akuerdo ku fiskal.