WILLEMSTAD.- Aeropuerto a registrá 62% bou e total moveshonnan kompará ku 2019.

Curaçao International Airport ta splika di nan Rekuperashon durante transishon, i tambe un

bista riba tráfiko di pasahero durante kuartal 4, na fin di 2020.

E realidat nobo a fòrsa e operashon di nos aeropuerto pa adaptá na demanda internashonal p’asina standarisá e rekisitonan di salú i seguridat, Curaçao International Airport a keda sertifiká dor di ACI, Airport Council International, asina akreditando esaki pa medidanan di salú ku e aeropuerto a tuma pa aliniá na prosedernan di ACI Aviation Business Restart and Recovery, rekomendashonnan di ICAO Council Aviation Restart Task Force, huntu ku e mihó práktikanan den e industria. CAP a adaptá e strategia di merkadeo i mensahenan di e aeropuerto dirigí na pasaheronan. Esaki tabata unu di ‘peace of mind’, komunikashon kla riba salú i práktikanan di seguridat, mínimo di kontakto físiko na puntonan, i limpiesa den tur áreanan di e fasilidatnan.

Den 2020 Curaçao International Airport a yega un total di 548.000 moveshon di pasahero. E moveshon aki tabata -64% bou di e pronóstiko inisial pa 2020 i -62% bou di e total di moveshonnan den 2019. Airport Council International (ACI) a indiká ku e pèrdida den moveshon di pasahero di aeropuertonan den 2020 ta -60% pa Nort Amérika i -61% pa

Suramérika i aeropuertonan di Karibe. E rekuperashon di tráfiko di pasaheronan den 2020 tabata 38% kompará ku 2019 i e promedio di e ‘overall load factor’ tabata 74%.

UNWTO ta indiká ku mayoria eksperto di turismo no ta ferwagt ku turismo internashonal lo regresá na nivelnan pre-Covid promé ku 2023. Curaçao Airport Partners ta keda optimista, di forma prudente, pa loke ta 2021  ̶  e aña di transishon den kua e kontenementu di e vírùs, e distribushon di e bakuna, e resistensia di e ekonomia i konfiansa di e konsumidó lo determiná e spit di rekuperashon. Mantené servisio aéreo ta ekstremadamente importante, ya ku aerolíneanan ta keda den situashon finansiero difísil i mester di tur ruta pa por mantené nan mes i ta rendabel.

“Nos ta wak bèk riba un aña ku tabata un di esnan ku mas reto, no solamente komo aeropuerto, pero tambe komo destinashon en general”, tabata palabranan di Paulo Mazzali, co-CEO di CAP. “No opstante e retonan aki, nos a usa e oportunidatnan ku nos realidat nobo a duna nos, p’asina re-inventá nos manera di hasi negoshi. Nos a eksperensiá gran pèrdidanan finansiero, a baha nos gastunan te na un mínimo, i ta sumamente orguyoso di nos tim, ku durante e tempunan difísil a keda kolaborá, enfoká i komprometé pa duna ‘peace of mind’! Ku sosten di nos forsa laboral i di nos akshonistanan, nos ta keda optimista, di forma prudente, pa loke ta trata 2021, ku un kresementu moderá den 2020 ku lo sosodé prinsipalmente den e di dos mitar di 2021”.