WILLEMSTAD.- Relashoná ku e situashon di wer na Kòrsou i loke por spera den próksimo oranan, nos a papia ku Fayna Haseth hefe di komunikashon di CAP (aeropuerto di Kòrsou). El a splika EXTRA ku for di momentu ku e temporada di orkan a kuminsá 1e di yüni, ya nan a tuma tur prekoushon nesesario. Aeropuerto ta bon prepará.

Ayera ku a anunsiá e tormenta biniendo nos direkshon nan a inspekshoná entre otro pista pa mira ku si tin ophetonan lòs pa kita nan for di kaminda. Tambe a inspekshoná e edifisio pa sigurá ku tur kos ta bon na òrdu.

El a bisa EXTRA ku aeropuerto di Kòrsou lo no sera. Nan ta habrí di 6 or di mainta pa 10 or di anochi. Solamente lo adaptá na e Toke de Keda manera a keda anunsiá i tin hende lo bai ta trahando for di kas. Tin algun servisio ku mester tin personal presente i esei CAP a sòru pe.

Pa loke ta trata buelonan sra. Haseth a bisa ku esei e no por papia di dje pero ku mester atendé ku kada kompania di aviashon separadamente.

EXTRA a chèk mas aleu i a komprondé ku diferente kompania di aviashon ta hasiendo e ahustenan nesesario pa asina nan por kumpli ku pasaheronan ku ta yegando Kòrsou i otronan ku tin di sali for di Kòrsou.

Miéntras tantu segun sra. Haseth, CAP ta reuní awe mainta tambe i kaminda ta nesesario pa nan tuma medidanan adishonal, esaki lo sosodé na su debido tempu.