...Riba foto por mira di robes pa drechi sr. Paulo Mazzali - co-CEO CAP, Dr. Alcalá - Epidemiólogo i unidat di investigashon di ministerio salubridat, Dr. Izzy Gerstenbluth - Epidemiólogo i tambe di GMN, sr. Josiah Arndell – kordinadó na aeropuerto...

WILLEMSTAD.- Curaçao Airport Partners N.V. (CAP) ta informá ku den kolaborashon ku Ministerio di Salú i den kuadro di kombatimentu di e pandemia di COVID-19, nan a traha un fasilidat na aeropuerto pa por hasi tèst médiko ku pashèntnan ku yega aeropuerto. Esaki ta entrante awe djabièrnè 29 di yanüari.
Mirando e desaroyonan ku tin rondó di COVID-19 i ta keda un preokupashon mundialmente, ministerio di salú a pidi CAP pa por instalá e tèst médiko na aeropuerto.
Un biahero ku yega Kòrsou i no tin su papelnan na lugá relashoná ku PCR tèst pa por drenta nos isla, e mester hasi e tèst na aeropuerto, promé ku e drenta nos isla.
Gobièrnu a skohe pa laboratorio nashonal ADC por manehá e área di tèst aki. Ta sigurá ku e liña di maneho ku tin pa ku biaheronan ku yega nos isla ta keda implementá durante e temporada di insertidumbre aki.
CAP ta kontentu di por a aportá i sostené e proyekto aki. A hasi adaptashon nesesario den e sala di imigrashon na yegada, kaminda e pasahero por keda guiá na e lokalidat pa e por hasi e tèst.
Seguridat i salú di nos aeropuerto i komunidat di Kòrsou ta prioridat di CAP. CAP ta kontinuá na sostené kada inisiativa.
Pa mas informashon tokante di e área di tèst aki, por konsultá ADC i GMN.