Djaweps awor 17 sèptèmber
WILLEMSTAD.-Ministerio Públiko i Integraal Afpakteam Curaçao, ku intermediashon di deurwaarder ta pasa pa benta públiko esta findishi, di un kantidat di vehíkulonan motorisá ku a keda konfiská. Esaki ta tuma lugá djaweps awor 17 di sèptèmber 11 or’ di mainta. Den e último añanan, Integraal Afpakteam Curaçao a realisá diferente investigashonnan i akshonnan den kua a konfiská un gran kantidat di artíkulo i propiedat. E investigashonnan i akshonnan aki tabata mas tantu dirigí riba kapital ku a keda optené pa medio di aktividatnan kriminal. Ku e benta públiko aki, Ministerio Públiko i Integraal Afpakteam Curaçao ke manda un señal kla na komunidat ku no mag di saka benefisio for di krímen.
Ministerio Públiko i Afpakteam tin intenshon di sigui tene findishi ku regularidat. Artíkulonan ku lo bende den públiko ta entre otro outo i skuter. Un i tur ku ta interesá por presensia e findishi riba e tereno di Arbeidszorg situá na Bellisimaweg z/n (zijweg Sta. Rosaweg pega ku SUVEC). Por mira e vehíkulonan riba dia di benta for di 8’or di mainta.