WILLEMSTAD. - Un kaso ku Kolegio di Apelashon pa kasonan di Amtenar a tuma un desishon, ta un disputa kaminda di un miembro di Kuerpo Polisial ta di opinion ku no a trata su petishon a base di trato igual. Su petishon ta pa promové den funshon ku forsa retro-aktivo i ku tur e oumentonan salarial ku esaki ta trese kuné.

Tabata na aña 2017 ku e petishon a keda hasí i e Minister di Hustisia di e tempu ei a rechasá e petishon, loke ku a pone ku e miembro polisial a start un proseso hudisial ku defakto a kuminsá for na aña 2019.

Dos siman pasá Korte ta konkluí e kaso ku un desishon negativo pa e miembro polisial.

Ta trata di un miembro ku a drenta den skol di polis na aña 1998. Na 2000 el a drenta den servisio temporal komo agente polisial. Mas den fin di aña 2000, el a keda tumá na trabou den servisio permanente.

Na aña 2010 sierto leinan a kambia pa loke ta trata Kuerpo Polisial nobo pa pais Kòrsou. Promé di desèmber 2015 pa medio di dekreto el a keda poné den e funshon di “noodhulp/handhaving”.

Na mart 2017 e polis aki ta tuma nota ku tin un diskrepansia pa loke ta trata trato igual i a entamá un huisio kontra di Minister pa motibu ku a rechasá su petishon pa e keda pa e funshon “senior medewerker noodhulp/handhaving” ku tur e derechonan ku esaki ta trese kuné.

Esaki e agente aki ta di opinion ku un otro kolega si a keda promové komo tal i ta di opinion ku ta trata di mesun situashon.

Korte a mustra e agente aki ku e kolega tin mas aña kuné den servisio polisial. Esaki ta trese kuné ku e kolega  tin mas eksperensia di trabou a base di e añanan ku e ta traha, pues no por hasi menshon di mesun situashon.

E loke ku e agente no tabatin na bista, ta ku e agentenan ku a drenta den servisio promé kuné, esta na aña 1996 i 1997 tabata den un posishon inkumbiniente kompará ku esunnan ku a kuminsá ku nan “opleiding’ na aña 1998 i ku a drenta den servisio na aña 2000. E grupo aki despues di 3 aña den servisio nan ta keda nombrá komo brigadir, miéntras nan tin ménos eksperensia ku esunnan ku a drenta promé, pero ku no ta kai den e areglo aki.

Pa trèk e asuntunan règt, a promové e kolega en kuestion.

Den e proseso aki e agente no a trese nada nobo dilanti ku no a keda diskutí den korte anterior ku lo por a kambia e desishon ya tumá. Di e forma aki e Kolegio no ta mantené e veredikto di promé korte manera e ta.