Despues di 9 aña proseso hudisial

Resientemente Korte Sivil den Promé Instansia a dikta fayo den un kaso ku por bisa a kuminsá for di aña 2012 ora ku un agente polisial ku tabata traha komo persona di seguridat pa un Minister, a haña su mes den un aksidente i despues a keda praktikamente inválido.

Esaki a pone ku e no por traha mas su oranan di “overtime”, el a pèrdè su salario normal, su salario ku e lo a bai gana i tambe e oranan èkstra ku e lo a traha i tambe posibilidat ku el a pèrdè pa keda promové.

Na total e agente a pidi un suma di 263.502 florin.

Manera menshoná, pa haña un idea di komplisidat di e kaso aki, mester bisa ku e proseso a dura kasi 9 aña largu.

Hues mr. Christiaan a konkluí e kaso i a motivá esaki den 7 página ampliamente ilustrando kada un punto i kon el a yega na su konklushon.

Korte a honra e plaka ku e lo a pèrdè di “overtime”, otro tipo di labornan ku e polis aki por a hasi, gastunan médiko ku e mes a kubri, gastunan di transporte, gastunan inmaterial, i gastunan di kobransa.

E kaso tabata entamá kontra di dos kompania di seguro aki na Kòrsou.

Korte a usa tur e rapòrtnan médiko ku tabata nesesario pa e yega na su veredikto.

E kaso tabata nesesario pa motibu ku e kompanianan di seguro no tabata ke a paga.

Korte a tene kuenta ku e 70% ku e agente polisial aki lo kobra ora e baha ku retiro honroso.

Esaki a trese Korte na un suma di 163.544,00 florin.