WILLEMSTAD.- Riba e kaminda djus pega ku sentro komersial Sambil, ku bista pa e kaminda prinsipal ta bola di shushi tin. Paña ku hendenna no ke mas, nan a bai benta djis kantu di kaminda, un bèrgwensa.
Dia 16 di yüli EXTRA a mustra riba e situashon aki kaba. Manera nos a skibi den nos edishon di 16 di yuli; E práktika di tiramentu di shushi kantu di kaminda òf den mondi a kontinuá apesar di e tantísimo akshonnan i kampañanan pa nos tene nos isla limpi. Den e kaso awor ta manera un kashi paña kompleto e shushounan a bai benta den mondi.
Den área di Veeris pega ku e sentro komersial Sambil na e lado ku ta tira pa Helmin Magno Wiels Boulevard, deskonosínan a deshasí di nan shushi di un forma no korekto i inasaptabel. E via aki ta hopi usa i sigur nada nechi pa tuma nota di shushi benta kantu di kaminda. Ta un via ku ta usa pa lokalnan pero tambe pa turistanan, teniendo na kuenta hotèlnan den bisindario i e sentro komersial di mas grandi di Kòrsou djis einan.
Deskonosínan a benta vários aparato elektróniko i tambe un kantidat grandi di paña. Tambe tabatin hopi otro shushi ku ta parse shushi di kas.
E akto aki ta unu hopi asosial. No ta tene kuenta ku nos isla ni un tiki, no ta tene kuenta kuantu bia siudadanonan ta organisá akshonnan di limpiesa i limpia e áreanan aki i ta lubidá ku ta un akto kastigabel pa lei. Ta kuantu lo a kosta pa djis kore un tiki mas i yega na landfill i tira e shushinan afó. Un biaha mas un akto bergonsoso i asosial.
Despues di e publikashon dia 16 di yüli, awe 2 siman despues tur e shushi tei meskos pone einan. Niun alma ku a Sali i limpia e área., ni sikiera esnan ku a benta e shushi einan, nan konsenshi no a remorde pa bai piki loke nan a benta einan. Awe nos ta bolbe mustra riba situashon i ban mira te ki dia e lo keda einan.