WILLEMSTAD.- Ministerio públiko a duna e promé 4 kurpanan di e 5 venezolanonan ku a resultá morto di e lancha ku a noufragá djárason dia 10 di yanüari último, liber pa entiero. Sinembargo te ainda ningun famia no a bin reklamá e kurpanan pa asina por bai ku nan Venezuela pa entiero tuma lugá.

Den rueda di prensa djaweps siman pasa bosero di polis sr. Huggins a indiká ku famianan na Venezuela a manda nan konosínan pa bai mira i tuma informashon si nan famianan lo ta entre esnan morto. Pero te ainda niun familiar no a yega Kòrsou pa reklamá nan defuntu.

Segun EXTRA a komprondé ku e prosedura ta ku si dianan bai i famianan no a bin reklamá kurpa di nan defuntu, lo wak ku kònsùl venezolano kiko lo bai hasi. E di 5 kurpa ku a haña djabièrnè ainda ta konfiská pa identifikashon ofisial tuma lugá i tambe pa demas investigashon por tuma lugá.

Durante di e reunion ku tabatin djabièrnè último na Aruba ku tòp di gobièrnu venezolano, Kòrsou a papia riba e mortonan i kon nan ta yega Venezuela. Den e reunion aki, Venezuela a indiká di lo manda avion militar pa buska e kurpanan. Pero ainda no sa si esaki lo tuma lugá tòg, ounke ku ainda famianan no a bin rekonosé e kurpanan.

Segun medionan venezolano, e alkalde di Colina, Coro di unda e víktimanan ta bin, a dekretá tres dia di luto. Tambe e alkalde a bisa huntu ku e gobernadó di estado Falcon lo kordiná ku outoridatnan di Kòrsou pa transportá e kurpanan pa Venezuela. Meskos ta konta pa e venezolanonan detené.

Loke tin di remarká ta ku e dos hòmbernan ku a topa riba dicho dia na Koraal Tabak, no tin nada di haber ku e lancha ku a noufragá, meskos ta konta pa e venezolanonan indokumentá ku a detené djabièrnè último den área di Sta. Rosa i La Fama Wijk.