WILLEMSTAD.- Tin muchu hopi polis for di kondishon den KPC, i lo ta un bon idea si nan por mantené nan kondishon optimal. Esei ta algu ku Minister di Hustisia demishonario mr. Quincy Girigorie a duna EXTRA rason riba dje. T’asina ku konstantemente for di komunidat tin remarkenan den direkshon dje kondishon físiko di sierto polisnan. Hopi biaha polisnan uniformá sa ta for di kondishon, ku barika grandi, obeso, i semper e remarke ta surgi: “Tras di kua ladron esaki ke kore?”

Di otro banda, agentenan ku ta forma parti di unidatnan spesial tur ta den óptimo kondishon, esei pa motibu ku nan ta den unidatnan spesial ku tin kondishon físiko komo un dje eksigensianan.

Segun Minister Girigorie, aunke esaki no ta un obligashon, pero komo polis un persona mester por hasi algu na su (kondishon) físiko. Regularmente por mira Minister Girigorie riba retnan sosial entrenando i trahando riba su kondishon físiko. Segun e mandatario, e ta bai gym pa su propio satisfakshon, pa e keda den kondishon, pero na mes momentu e ta spera di por inspirá otronan pa hasi meskos.

Na pòst di Rio Canario banda di e skol di polis a invertí den un gym, tin aparatonan spesial aden. Tin hopi polis ku ta usa nan tambe.

E tin di rekonosé ku e trabou di polis no ta un trabou di 8 or pa 5 or, ku e tin di retonan, pero e polis mester por saka algu di tempu pa e traha riba su kondishon. Pero último tempunan ta trahando riba e parti di kuido personal. Nada di esakinan no ta obligatorio, i un dje motibunan ta ku a start ku un pais nobo sin ku tur kos ta bon reglá. Ta resientemente por bisa ku e Areglo Polisial a haña un bachi legal, siendo ku for di 2010 e fundeshi dje organisashon polisial mester tabata reglá.

Aworakí tin e eksigensianan inkorporá pa loke ta formashon pa bira polis. Tur loke ta aspektonan dje posishon hurídiko ta kla, i esaki ta forma e base. Tin eksigensianan pa formashon di polis, ku mester ser inkorporá den un ‘landsbesluit’. Si esakinan no ta kla ainda, no tin un base pa eksigí di un hende pa e mantené su mes den kondishon físiko optimal.