Den temporada di COVID e situashon a bira pió

WILLEMSTAD. - Arthur Nivillac, Direktor di Optima Arbodienst último lunanan ta eksperensiando hopi inhustisia ku ta tuma lugá pa ku trahadó. Empresanan ku ta haña NOW, ta sigui kita hende for di trabou, miéntras ku NOW ta spesial pa evitá retiro. Ta kita dianan di vakashon, sin ta den konsulta ku por ehèmpel SOAW. E loke ku ta mas serio ainda, ta obligá trahadónan pa boluntariamente firma nan mes karta di retiro ku kuater luna di pago di salario, miéntras e trahadó tin 13 aña ta traha pa e empresa. Asina Nivillac por sigui mustra riba hopi inhustisia último tempunan.

Nivillac a splika ku pa definishon Optima Arbodienst  ta pa mantené e trahadó sano i safe den su ambiente laboral. Pues nan ta traha pa tur dos partido, pa motibu pa lei tur dos tin obligashonnan i deber ku kada un mester mantené nan mes na dje

E momentu ku por ehèmpel e dunadó di trabou no ta kumpliendo ku su deber i obligashonnan, si Optima Arbodienst  keda aserká, nan lo sòru pa trèk e situashon règt.

E loke ku Nivillac a opservá, ta ku na muchu okashon ta eksigí demasiado di trahadónan, esta pa e trahadó duna tur ku nan tin, pero si mira den ki kondishon e trahadó ta traha, hamas e trahadó por entregá un trabou optimal.

Situashonnan ku Nivillac ta eksperensiá, si tuma nota riba ki tipo di stul e trahadó ta sinta i e tin di traha oranan largu sin pousa i eksigí ku e trabou ta keda bon hasí tambe.

Si e dunadó di trabou ke 100 porshento di su trahadó, e dunadó di trabou mester sòru pa tur kos ta na òrdu i si esei no ta e kaso, no por eksigí e trahadó pa entregá un trabou 100 porshento.

Ora ku e trahadó faya, mesora ta manda e trahadó Arbodienst ku e speransa ku lo kùr e trahadó af. Nivillac a splika ku lei ta hasi menshon ku dunadó di trabou i e trahadó tur dos tin nan obligashonnan i deber. Pero ketu bai aki na Kòrsou tin e tendensia ku ora un hende tin un trabou, e mester ta kontentu i no reklamá i òf pidi nada.

Ora un hende no ta presta muchu bon, e dunadó di trabou no ta laga chèk kiko ta e motibu, pero ta skohe pa kita hende for di trabou inhustamente, sin tene kuenta ku e kondishon laboral ta hasi e trahadó malu.

Optima Arbodienst tin un departamento “Bureau voor Rechtshulp” i aki tur hende por yega pa pidi konseho. Esaki ta konta pa e trahadó komo e dunadó di trabou.

Ultimo tempunan e departamento aki ta hopi okupá ku trahadónan ku ta haña retiro sin motibu válido.

Manera menshoná ariba, ta obligá trahadó firma su retiro boluntariamente ku kuater luna di salario. Esaki poniendo hopi preshon pa e persona firma. E loke ku ta mas remarkabel ta ku ta trata di empresanan ku hopi hende no por kere ku ta hasi e tipo di kosnan aki. Ta hopi hende a keda kitá for di trabou Nivillac a splika. E último aki a bira órden di dia, sigur ku e situashon di COVID aki.