WILLEMSTAD.- Ayera un bia mas Regis Djaoen( 41) kondená na bida largu mester a bolbe presentá den Hof. E motibu tabata pa wak kon leu a yega ku e proseso di revishon pa e por bin bèk den komunidat, despues ku Hof a manda e tim ku ta konsistí di Reclassering, sikólogo i tambe maneho di tim di prizòn sinta huntu pa yega na un plan di resosialisashon pa Djaoen.
Den e kaso di dia 1e òktober último Hof a trese dilanti ku Djaoen por bin na remarke pa haña un banchi. Tambe nan kier a sa kon ta pará ku e parti di resosialisashon. Malvina Cicilia ku ta na kabes di e departamento di resosialisashon tambe tabata presente ayera den sala di korte pa promé bes. Den e kaso anterior e tribunal di Hof a bisa ku nan ke papia kuné tambe, mirando ku ainda e tim konserní no por yega na un plan di resosialisashon pa Djaoen.
Cicilia a splika entre otro ku e motibu ta ku no tin koperashon sufisiente di sierto personal pa por ehekutá e plan di reso i asin’aki niun plan por logra si no hasi nada. El a bisa mas aleu ku esei ta pone ku no por kuminsá resosialisá. Segun Cicilia aña pasá tabatin 13 wèlga di trahadónan di prizòn i kada un wèlga ta dura 3 siman ku ta stroba e proseso di resosialisashon.
El a bisa Hof ku pa djaweps awor e lo entrega prokurador general un plan pa Djaoen pa por kuminsá traha riba su parti di resosialisashon mas pronto posibel.
Abogado di Djaoen mr Prevo, tambe a bisa ku no ta hustu pa su kliente mirando ku no a hasi nada despues di e último tratamentu. Tur proyekto a keda wantá relashoná ku e krísis di COVID. El a bisa di ta spera ku awor si prosedura lo kuminsá kana pa Djaoen haña resosialisashon.
Den e kaso anterior e miembro di e tim di maneho Hasselmeyer ku ta Unid manager di SDKK, a splika ku dia 1e di yanüari 2021 nan ta haña 50 banchi na disposishon. Pero riba lista di espera tin 18 detenido ku ta wardando riba e banchi.
Hasselmeyer a splika ku e prosedura di nan ta ku esnan ku ta na bùrt segun nan kastigu, ta bin na remarke pa haña banchi promé.
Hues Carmelia na su turno a bisa ku Djaoen tin hopi aña será i na su opinion e mester ta riba lista pa bin na remarke pa haña banchi promé ku tur otro detenido.
Djaoen ta keda akusá di a tira e bewaker di fam van der Dijs mata ku su propio arma durante ku e tabata laborá na pòmp di gasolin Gasora dia 14 di febrüari 1999 .
Ku su 21 aña Regis a keda kondená na kastigu di bida largu.
Tambe el a keda akusá pa poseshon di 2 revòlver kaliber 32 i 38.; ladronisia di outo di un fiskal i intento di asesinato riba tres agente polisial momento ku nan tabata bai hasi su detenshon dia 17 di febrüari 1999.
Na Febrüari aña pasa e kaso di revishon a inisiá paso Djaoen a yega 20 aña di kastigu.
Mirando e kódigo penal ku a kambia na 2011, kaminda ta bisa ku mester evaluá e kondenado di bida largu, despues di 20 aña, pa mira si e por bai den libertat, Djaoen a probechá e oportunidat aki pa wak si e por bai su kas.
Lei ta bisa ku 7 aña promé ku e 20 aña di kastigu yega, mester traha un plan di resosialisashon pa e detenido, bou di guia di Reclassering, sikólogo, sikiater i e personal di prizòn ku tin ku traha un rapòrt di evaluashon.
Djaoen mes a bisa ku kada bes ta bisa di ta hasi algu pero nada konkreto.
Dia 18 di febrüari 2021 pa 2 or di mèrdia Hof lo bolbe bin huntu pa papia di e plan di resosialisashon ku lo mester keda entregá 1 siman promé.