WILLEMSTAD.- Ayera Fundashon Union ta Nos Forsa a kuminsá ku un akshon di firma kontra di e sentensia abou ku e hòmber lider di un iglesia “apòstel” Orlando “Lando” Balentina (OB) a haña den korte di promé instansia, pa vários kaso di violashon di menornan di edat ku e tabata kuida.
Primeramente e intenshon tabata pa a tene un manifestashon ayera riba Wilhelminaplein, pero a kambia esaki den akshon di firma. Pasobra e fundashon ta pendiente pa djárason awor huntu ku mas organisashon tene un rueda di prensa pa duna informashon riba un manifestashon mas grandi i akshon di firma ku ta bai tene djasabra awor na mesun sitio. Esaki ta loke ku señora Yolanda Faneyt a duna di konosé na EXTRA.
Apesar ku e manifestashon a para, i a tene akshon di firma, asina mes algun hende a presentá pa firma.
Segun sra. Faneyt a splika ku e manifestashon ku a para djaluna tabata pa demostrá e mal kontentu ku e veredikto di OB debí na e kambio di lei ku a tuma lugá.
E protesta ta pa mira kambio di bèrdat.
P’esei e fundashon a uni ku un par di organisashon pa forma un plan pa manifestá i pa informá e pueblo kiko a pasa, i pa eksigí kambio di lei den Kódigo Penal. Un lei ku a wòrdu kambiá bou di nos nanishi i nos no a hasi kaso na dje.
Na 2012 Bos di Hubentut a kolektá 17.000 firma entregá na e minister konserní di e aña ei. Kiko a pasa ku e firmanan ei? Ken sa unda nan a keda? Dikon e lei a wòrdu kambia? I kiko a hasi ku e firmanan?
Manera ariba indiká djárason lo tin mas informashon di e manifestashon grandi di djasabra awor.