WILLEMSTAD.- Ayera durante di oranan di mèrdia a tuma lugá un aksidente den tráfiko kaminda 5 persona tabata envolví inkluyendo tres mucha menor di kual un ta un beibi.
Na e sitio por a komprondé ku un vehíkulo Chevrolet moviendo riba Arubastraat direkshon Otrobanda a pasa den lus kòrá nèt na momentu ku un otro vehíkulo Hyundai tabata saliendo for di Frederickstraat despues ku su lus a bira bèrdè pa bai direkshon brùg Juliana.
Esaki a pone ku e choke tabata unu inevitabel i e vehíkulo Hyundai a keda bira algun rònchi riba kaminda pa finalmente logra para.
Den e vehíkulo aki tabatin un dama shofùr i tambe un beibi ku tabata patras den su stul ku a resultá heridá i a risibí tratamentu na e sitio serka e personal di ambulans i despues a keda transportá pa departamento di emergensia di Hospital Sint Elizabeth pa tratamentu médiko avansá.
Den e vehíkulo Chevrolet tabatin un dama shofùr i dos menor ku a sali ileso pero ku algun doló interno.
Polisnan mester a sera kaminda pa asina Forensys por a atendé ku registrashon di e aksidente.