WILLEMSTAD.- Den luna di yanüari a sali un reto den korant ku e kòp ku ta bisa “Warda riba aksidente”. Ta trata di awa ku kontinuamente ta subi kaminda públiko, esaki di un pòmp for di un kas den Angloweg. E awa aki ta sòru pa lima krese riba kaminda i hasi e kaya leim leim. Te ku awe, segun abitantenan di Mahaai, e situashon a keda meskos. Tabatin diferente aksidente, for di hende ku ta slep, baiskel ku ta aksidentá basta serio te ku e siman aki un outo di un kolaboradó di GMN ku a dal 50 meter leu den un palu. El a bisa di a pèrdè kontròl riba stür.

E abitantenan ke sa kiko lo a pasa si e aksidente tabata den e otro direkshon kaminda muchanan di Johan van Walbeeckschool ta kana i ta kore rísiko ku outo ta dal nan. Ya tin asta daño ku a keda okashoná na e asfalt ku no tin muchu tempu ku a keda poné einan. Awor e gastunan ku ta surgi aki ta e pagadó di belasting tin di karg’e, segun e abitantenan den e bario ta reklamá. Nan a purba via di polis i tur instansia pa hala atenshon riba e sistema ilegal ku awa ta keda mandá riba kaminda públiko. No ta solamente e abitantenan ta sinti e konsekuensianan di e situashon aki pero tambe e tráfiko ku ta kore riba Mahaaiweg/Rozenweg. I teniendo na kuenta e daño riba e asfalt por papia di un daño ku henter Kòrsou tin di karga. A yega tempu pa minister di VVRP/GMN tuma nan responsabilidat i no sinta warda te ora e aksidentenan ta muchu mas grave, e abitantenan ta bisa.