UPDATE:

WILLEMSTAD - Djasabra 30 di òktober 2021, alrededor di 01.05’or di mardugá, Sentral di Polis a risibí informashon di dos aksidente di tráfiko ku a tuma lugá praktikamente simultáneamente riba Presidente Romulo Betancourt Boulevard na altura di Konsulado Merikano i riba Juliana brug.

Na yegada di e unidat dilanti di Konsulado Merikano a topa ku 4 vehíkulo aksidentá i tabatin un persona pegá den un di e vehíkulonan.

I na e otro aksidente riba brùg tabatin mas o menos 15 vehíkulo enbolbí i ku 4 persona heridá, mientras un víktima tabata pegá den un di e vehíkulonan.

Mester a pidi asistensia di ekipo di reskate di brantwer pa a saka e víktimanan ku tabata pegá den e vehíkulonan.

Ku ambulans a transportá e víktimanan den situashon di preokupashon pa sala di emergensia di C.M.C. Situashon di e dos víktimanan ku tabata pega den nan respektivo vehikulonan, ta krítiko.

Algun otro víktima ku a sufri leshon ménos grave, a keda tratá na e sitio mes i despues por a bai nan dòkter di kas.

For di un investigashon preliminar ku polis a hasi na e sitio a resultá, ku debí na un aksidente ku tabatin riba Arubastraat, a pone ku diripiente shofùrnan di e vehíkulonan a bai aksidentá tras di otro.

Departamentu di Tráfiko ta kontinuá ku e investigashon.

====

WILLEMSTAD – Awe mainta Kòrsou a lanta ku e notisia di e aksidente ku a enbolbí un gran kantidat di outo for di e parti di subi brùg te riba brùg mes direkshon di Punda pa Otrobanda. Ta traha aki di un aksidente basta serio durante oranan di Toke de Keda. Mas ku 13 outo tabata enbolbí. Tabatin persona ku a keda pega i Brantwer Mundu Nobo mester a akudí na e sitio pa atendé e víktima aki. Ambulans a transportá vários víktima pa CMC. EXTRA ta pendiente e relato ofisial di polis pa trese esaki pa nos lektornan.