Pasahero sintá patras a fayesé na e sitio

Informashon adishonal riba e aksidente grave i fatal ku a tuma lugá awe mainta ta indiká ku e outo tabata bini riba kaminda for di Zegu direkshon pa Barber i pa motibunan deskonosí a bai dal di forma violento kontra di un kònteiner. Manera indiká tabatin dos persona den e outo, e shofùr i un pasahero sintá patras. E pasahero sintá patras a haña hopi sla na su kabes ku konsekuensia ku el a fayesé na e sitio mes. E shofùr tambe a haña hopi sla, asina e bosero polisial Imro Zwerwer a duna di konosé.

Aksidente ku morto na altura di Krakeel

WILLEMSTAD.-Algun ratu pasa polis mester a bai Banda Bou na altura di Krakeel pa un aksidente hopi serio ku a tuma lugá. Un outo di famia pa motibunan deskonosí a bai bòltu i resultá den un kantor di number.

E promé informashon ta indiká ku lo tin un persona hopi serio miéntras ku un otro lo no ta duna señal di bida mas. Pendiente e detayenan ofisial di polis, EXTRA lo trese mas informashon riba e kaso lamentabel aki.