WILLEMSTAD – Awe alrededor di 12:30 am polis mester a akudí ku urgensia pa un aksidente di tráfiko riba Caracabaaiweg na momentu ku un vehíkulo lo mester a alkansá un peaton. E sitio di e aksidente tabata nèt dilanti di Luna park i e víktima lamentablemente a bin pèrdè su bida. E promé informashonnan ta indiká ku e víktima lo a kaba di kumpra su ko’i kome na e trùk di pan i a bai krusa kaya pero no a paga tinu ku un outo tabata bin i esaki a alkanse. E outo a kore bai laga e víktima tambe pues polis investigando e kaso komo unu di ‘hit & run’. E víktima mes tabata un hende hòmber. Vários unidat di polis a buska e outo. Ambulans a akudí an e sitio pero ya no por a hasi nada mas pa e víktima debí na e vários leshonnan ku el a risibí. Dòkter di polis mester a bin na e sitio pa konstatá morto. Den transkurso di awe ta warda e informashon ofisial di polis.

Bosero di Kuerpo Polisial Kòrsou sr Maurits Rosalina ta hasi un apelashon e shofùr ku a dal e persona awe mardugá riba Caracasbaaiweg pa bai entregá su mes na warda di polis pa atendé ku e aksidente aki. Si a kaso tin testigu di e aksidente fatal aki òf ku tabata na e trùk di pan òf tin informashon por tuma kontakto mesora ku 917.

Vershon ofisial di polis:

Djamars 7 di òktober 2025 alrededor di 00.12’or, Sentral di Polis a risibí informashon di un kaso di aksidente grave ku a tuma lugá riba Caracasbaaiweg, algu despues di e krusada ku Bronsweg den direkshon ost.

Na yegada di e promé unidat, el a tuma nota di un hòmber heridá drumí abou riba kaya i ku ya no tabata duna señal di bida.

For di investigashon preliminar a sali na kla ku e víktima a keda alkansá pa un vehíkulo, nèt na momentu ku e tabata krusando kaya.

Despues di e aksidente, shofùr di e vehíkulo a kontinuá su destinashon, sin laga su entidat atras.

Personal di ambulans a presentá na e sitio, pero no por a hasi nada mas pa e hòmber ku a sufri leshonnan serio a konsekuensia di e aksidente.

Dòkter di polis ku tambe a keda notifiká, a konstatá morto.

Investigashon den e kaso ta kontinuá.