WILLEMSTAD.- Den oranan di mèrdia vários unidat di UST a bai na altura di Panamá pa atendé ku un aksidente di tráfiko. Shofùr di un SUV ku tabata manehando direkshon di Domi i dado momentu a pèrdè kontrol riba su stür, dal kontra di vangrail pa despues resultá di bòltu.

A pidi presensia di ambulans na e sitio mirando ku e damita ku tabata sinta den e asiento di pasahero a sali levemente heridá. Personal di ambulans a tira bista riba e víktima i a mand’e su dòkter di kas pa mas tratamentu médiko avansá.

Polisnan a será e kaminda mirando ku tabatin un palu di lus ku a risibí daño material i tabata len di banda formando peliger pa outomobilistanan.

A tuma kontakto ku Aqualectra di forma ku por a manda algun personal na e sitio pa atendé ku e situashon.