WILLEMSTAD.- Den oranan di mardugá Kòrsou a registrá dos morto mas den tráfiko. E aksidente a tuma lugá na Banda Bou riba e kaminda pegá ku kloof entre un motersaikel i un outo di famia. Segun informashonnan risibí na e sitio, un di e shofùrnan a bai kore na man kontrali i a pone ku nan a dal frontal. E promé informashon a mustra ku tabatin 3 herido, di kua dos hende hòmber i un hende muhé.

Den e outo tabatin un hende hòmber i un hende muhé miéntras ku e motersaikel su shofùr ta un hende hòmber. Entretantu a drenta informashon ku ámbos shofùr den e aksidente aki a pèrdè nan bida. Forsa na famia. Mesora un supliká na tur outomobilista pa aktua mas responsabel den tráfiko. E dianan aki ku tin aktividatnan di karnaval ta hopi nesesario pa tur esnan ku ta partisipá den tráfiko hasi esei ku mas prudensia.

UPDATE:

#KOMUNIKADO DI POLIS:

Djasabra dia 2 di mart 2019 alrededor di 02.42’or di mardugá, Sentral di Polis a dirigí unidat di Barber pa Weg naar Westpunt na altura di Kloof, pa un aksidente grave ku a tuma lugá entre un motosaikel i un outo di famia.
Na yegada di e unidat, ámbos shofùr, tantu di e motosaikel komo di e outo di famia, no tabata duna señal di bida.
Mesora a pidi presensia di ambulans, pero na su yegada no por a hasi nada mas pa e víktimanan.

For di un investigashon ku polis a realisá na e sitio a sali na kla ku shofùr di e motosaikel ku tabata kore riba un velosidat bastante haltu den direkshon di Punda, pa motibunan deskonosí, a bai kore riba man kontrali i dal violentamente kontra di e outo di famia ku tabata bayendo den direkshon di Westpunt.
Debí na e impakto fuerte aki, ámbos shofùr a sufri heridanan múltiple i a bin fayesé na e sitio di aksidente mes.
Ku yudansa di ekipo di reskate di brantwer, mester a kòrta e outo pa saka e shofùr.
Un dama ku tabata den e outo, a risibí heridanan di ménos gravedat i a keda transportá pa poli ku ambulans, pa opservashon.
Dòkter di polis a konstatá morto di e motosiklista Noverick Bernardo Bartholomeus, nase na Kòrsou dia 6 di òktober 1987 i di shofùr di e outo di famia Jonathan Esteban Regina, nase na Kòrsou dia 26 di yanüari 1993.

Investigashon den e kaso aki ta kontinuá.