Willemstad.- Kuerpo Polisial a kaba di duna di konosí ku un hòmber envolví den un aksidente serio ku a tuma riba brùg Juliana a fayesé a konsekuensia di e múltiple heridanan ku el a sufri.

Segun e informe polisial,  djasabra 12 di mart 2022 alrededor di 00.13’or, Sentral di Polis a risibí informashon di un aksidente di tráfiko grave ku a tuma lugá riba brug Juliana direkshon di Otrobanda i ku tabatin un persona gravemente heridá.
Na yegada di e unidat di Otrobanda, el a topa dos vehíkulo, di kua un motosaikel i un outo di famia ku a aksidentá.

E motosiklista tabata drumí abou i ya einan tabatin indikashon ku su situashon tabata krítiko.
Mesora a pidi presensia di ambulans pa transportá e hòmber víktima aki pa sala di emergensia di C.M.C.

For di investigashon preliminar ku polis a realisá na e sitio, a sali na kla ku shofùr di e motosaikel pa motibu te ainda deskonosí, a bai dal parti patras di e outo di famia i lastimá su mes seriamente.
Alrededor di 02.00’or Sentral di Polis a risibí notifikashon ku e víktima a bin fayesé a konsekuensia di e multiple herídanan ku el a sufri den e aksidente.

Debí ku e víktima ta un personal di defensa hulandes, KMar a keda enkargá ku e proseso di informá famia i eventualmente publikamentu di nòmber.