WILLEMSTAD.- Kumpramentu di servisio den akomodashon i aktividatnan di kuminda, ku ta sektor di horeca, den aña 2020 a baha drástikamente. Asina Ofisina di Sentral di Statistik a duna di konosé den un publikashon di djaweps último. Tur kos ku ta kai bou di e sektor di turismo a baha drástikamente na 2020. E aktividatnan di e ramo di hotèl i restorant a baha bastante en komparashon ku e aña 2019, ku ta mustra un subida di 4.9%.
Den 2020 tantu e kantidat total di turistanan ku ta hospedá i e kantidat di turista ku ta bishitá Kòrsou a baha ku respektivamente 58 porshento i 62 porshento. E bahada aki ta bai pareu ku e disponibilidat di transporte aéreo, unda hopi a stòp di bula den diferente region pa motibu di pandemia. E restorantnan i barnan tambe a sinti e efekto, nan no tabata operá kompletamente i tabata mará na orarionan stipulá
i kantidat di bishita i sierto servisio. Tur e desaroyo aki menshoná ta trese un bahada den e ramo di hotèl i restorant ku kasi 20 porshento.
Aktividatnan den e ramo di servisio empresarial, manera aktividatnan di propiedat inmóbil, aktividatnan profeshonal, sientífiko, tékniko; aktividatnan atministrativo i di sosten (apoyo) tambe a wòrdu afektá ku un kremp di 29 porshento.
CBS djaweps último a duna di konosé ku Kòrsou a konosé un bahada drástiko den e aktividatnan ekonómiko. Den total a produsí un redukshon den e produkto interno bruto di 18.4 porshento pa aña 2020.