WILLEMSTAD.- Banko di Seguro Sosial a logra yega na areglo ku Colombia pa loke ta e beslag ku a pone riba kurpa di un yu di Kòrsou ku a muri na e pais ei.

Manera EXTRA a publiká djasabra pasá na luna di òktober último a manda un pashènt Colombia mirando su kondishon delikado kousa pa e aksidente ku el a sufri. E hòmber no tabatin pasport i mester a laga traha un dokumento di emergensia, un lassez passer ku kua a hiba e pashènt Colombia den buelo ambulans. Personal dje hospital kaminda a hiba e pashènt kumpliendo ku leinan kolombiano a notifiká Medicina Legal dje kaso, esta ku nan tin pashènt ku a muri a konsekuensia di heridanan ku el a sufri den un aksidente. E entidat kolombiano mesora a embargá e kurpa sin bida. Famianan dje defuntu a trata di atendé e asuntu aki na Colombia pero no a logra.

Manera EXTRA a publiká kaba outoridatnan kolombiano a eksigí un subrina dje defuntu pa hasi un tèst di DNA pa establesé ku e ta famia promé ku nan entregá e restunan. E tèst di DNA a produsí un mismatch loke a hasi e kaso mas difísil. SVB a pidi asistensia di embahada di reino na Bogotá pa mira kon por atendé e asuntu i logra ku ta lanta e beslag riba e restunan di moda ku por trese e defuntu Kòrsou pa un entiero digno.

E embolbimentu di embahada tampoko a duna resultado deseá i awor ta tratando pa mira si outoridatnan kolombiano por manda un òf mas hende Kòrsou pa bin hasi e tèstnan di DNA riba otro famianan dje defuntu. E esfuerso di SVB a sigui tambe den wikènt te ku finalmente a logra yega na un akuerdo pa asina kurpa di e persona en kuestion por keda tres’é Kòrsou. EXTRA a komprondé di SVB ku ya e famianan a hasi trámite pa trese e kurpa Kòrsou pa aki e por keda derá.