Apesar di elekshon na St. Maarten

WILLEMSTAD.- Resultado di elekshon na St. Maarten ta enserá ku e akuerdo pa sania situashon finansiero di ENNIA Leven ta keda bou di preshon. Partidonan URSM ku 3 asiento, DP tambe ku 3 asiento i PFP ku 2 asiento a palabrá for di djamars mardugá ku nan lo sigui traha huntu den un koalishon nobo.

Huntu e 3 partidonan aki tin 8 asiento loke ta sufisiente pa un mayoria di parlamento. Tin e posibilidat ku ta amplia e base di e koalishon ku un partido mas ku probablemente ta partido SAM ku tin 1 asiento.

Kon ku e formashon resultá den detaye, e base prinsipal di e koalishon lo konsistí di partidonan ku a ekspresá nan reserva riba e akuerdo ku gobièrnu di Kòrsou, Banko Sentral di Kòrsou i St. Maarten (CBCS) i gobièrnu di National Alliance i UP di St. Maarten a firma. Minister di Finansa demishonario Marenka Gumbs (DP) den un konferensia di prensa resien a bisa ku el a indiká na CBCS ku St. Maarten ke sali for di e asina yamá “peak facility” menshoná den e akuerdo.

Esaki ta un fiansa indirekto ku por hasi uso di dje si un pais no tin sufisiente fondo pa kumpli ku e obligashonnan finansiero den e ‘fondo di resolushon’ pa ENNIA. Miéntras ku St. Maarten por kumpli ku su obligashonnan finansiero, Kòrsou na su turno no por Gumbs ta bisa.

“Pero ámbos pais mester kubri gastunan di e “peak fascility”. Komo minister di Finansa mi no por permití ku ta hasi uso di St. Maarten pa kubri gastu di algu ku no ta pertenesé na nos”, e minister a bisa.

Gumbs a sigui trese dilanti ku ora el a pidi pa saka St. Maarten for di e areglo di “peak fascility” aki el a dal den mas informashon. “Ta importante pa pagadónan di impuesto di St. Maarten ta na haltura ku a base di e akuerdo firmá nan no ta paga solamente pa kubri gastunan di aseguradonan di St. Maarten, pero tambe lo paga vários mion pa kubri gastunan di aseguradonan di islanan BES i Sürnam i alabes gastunan operashonal anual di un kompania privá, ENNIA.”

Gumbs no ta di akuerdo ku miéntras kompanianan di St. Maarten ta sufri gobièrnu di e isla ta yuda un kompania privá ku su benefishinan primario, gastunan di impuesto, primanan sosial i empleo ta na Kòrsou. “Den tur honestidat mester a atendé otro ku e asuntu di ENNIA. Gobièrnu mester a pidi aprobashon di parlamento promé ku e firma e akuerdo na aprel 2024.”

El a sigui splika ku na Kòrsou parlamento a duna su aprobashon na febrüari, loke ta promé ku gobièrnunan di Kòrsou i St. Maarten a firma e akuerdo na luna di aprel. St. Maarten sinembargo a firma e akuerdo den purá sin aprobashon adelantá di parlamento, djis promé ku a bin un kambio di gobièrnu pasobra nan tabata bou un preshon enorme.

“Preshon di ken mi no ta sigur. Ta p’esei nos ta den e situashon aki awe”, e minister a deklará.