Akusado den kaso asesinato ta lanta  mustra hues sorprendentemente esnan ku a tira

Kaso de ZonWILLEMSTAD.-  Ayera korte di promé instansia  a trata kaso asesinato “De zon” den pro forma. E kaso  a keda kombertí den deklarashonnan inkriminante di parti di  e akusado Jerrel Nivillac (30), ku a trese basta tenshon den sala. Nivillac  a atmití ku awa na wowo ku ta hende inosente a keda likidá.

Ta trata di un kaso ku a tuma lugá dia 22 di yüni aña pasa di kual e víktima Idrick Sebastian Francisca, nasé na Kòrsou dia 20 di yanüari 1995 a wòrdu asesiná ku un arma kandela di un forma misterioso.

E akusadonan Jerrel Nivillac (30), Sherwin( Pumpi) Pieters(19) , Druwently (Droopi) Pieter (28) i Yu Liang Wu (22)  ta esnan ku ta keda akusá di a kometé e akto aki.

Nivillac a keda tres’é pa miembronan di tim di atrako.

Fo’i ora Nivillac a drenta sala, por a mira ku e tabata sinta ku un kara basta desesperá i hopi será.   Hues a puntra kada akusado kiko nan tin di bisa.

Tantu Pieter, Pietersz i Wu a bisa ku nan no tin nada di aber ku e kaso i ku nan ke bai kas serka nan famia. Na momento ku hues a puntra Nivillac kiko e tin di bisa, e akusado a lanta i grita ku ta Droopi i Pumpi ta esnan ku a tira i arma ku nan a tira  ta di Wu. Nivillac ku awa na wowo a bisa ku e si ta kompletamente  inosente den e kaso aki i ku e hòmbernan mester papia e bèrdat.

Mesora  hues van Lieshout a splika Nivillac ku e loke e ta bisa ei ta hopi serio i si e ke pa e tin balides, e tin ku hasi deklarashon bou di huramentashon, di kual Nivillac a bai kompletamente di akuerdo.

Riba e dia en kuestion algun ora promé ku e asesinato na De Zon, e hòmber Marlison  Pieter alias “Sueño” a keda likidá den Kura Piedra den kaya Talco.

Algun ratu despues mas o ménos kuartu pa 1 di mardugá, polis a keda dirigí pa Rooi Santu na altura di e panaderia, kaminda un outo a dal den muraya i e hòmber den e vehíkulo tabata tur na sanger.

Na yegada di polis nan a mira ku e  shofùr aki tabatin algun herida di bala na altura di su kabes i kurpa.

Nivillac ayera bou di huramentashon a duna su deklarashon. El a konta ku riba e anochi ei e tabata drumi, ora ku direpente el a tende batimentu na su bentana. Ora el a lanta wak el a mira ku ta Pumpi, ku tabata yorando bisando ku nan a mata su ruman ku ta “ Sueño”. Pumpi a bisé pa nan bai Kura Piedra pa asina e mes wak kiko a pasa.  Segun Nivillac, ora ku e tabata bai e víktima  Fransisca a kore yega serka dje i puntr’é si e tin vlui pe.

E na su turno a bis’é si pa e sigui su ruta. Na kaminda nan a pasa buska Droopi.

Ora ku nan a yega Kura Piedra, nan a bin topa e kurpa di “Sueño” bentá abou. Segun Nivillac , Pumpi a bis’é ku ta e gainan di Army mes a mata su ruman. Esei a pone ku miedu a drent’é i a bisa nan pa  nan bandoná e sitio.

Na kaminda tantu e komo Droopi a tuma nota di un vehíkulo ku tabata persiguí nan. El  a kore desviá i drenta den un hanchi. Segun Nivillac, e ora ei el a baha fo’i su outo  kue su arma di kandela den baul i pas’é pa Droopi.  Nan a kore bai bèk Rooi Santu sin mira e outo mas. Ora ku nan a yega, un gai banda di kas  a bin bisa nan ku tin yen outo ta koriendo sospechoso bai bin eifó. Segun Nivillac hansha i miedu a drenta nan. Direpente, el a mira un vehíkulo ku tabata aserkando. A resultá di tabata Fransisca. Pumpi a bis’é ku ta e hòmber ei a mata su ruman. Segun Nivillac, Droopi a mek riba e pa tira riba e vehíkulo, pero e arma no a tira. Despues e mes a tuma su arma bèk  pa tira den laira  pero tampoko e arma no a tira. Segun Nivillac mas aleu, el a mira kon Pumpi ta kore pasa su dilanti i bai den direkshon di Wu su kas. E tabata bezig ku su arma, i a disidí di drenta su outo i kore bai kas. Ora el a yega kas, el a keda wak den direkshon di e chinu kaminda el a bai laga e otronan. Despues el a kòrda ku Pumpi a laga su telefòn den su outo.  Ora el a bai hiba Pumpi su telefòn, el a tende ta papia ku un primu di e suseso.  Segun Nivillac, Droopi a bis’é siguiente dia pa bende su outo i kima su pañanan. Segun Nivillac, Droopi a kont’é ku Pumpi a tira i e a kita e arma i kaba e lachi riba e víktima. Nivillac a duna di konos’é ku nan a mata hende robes i inosente. Nan tur tabata spantá e anochi i a kometé un fout grandi. El a bisa ku nan tur i reshèrshinan a kometé e fayo.  Fiskal , hues i abogadonan  a hasi  Nivillac vários pregunta , di kual el a desviá basta kada bes. Nivillac a bisa ku e a tuma su responsabilidat i e ke pa e otronan tambe hasi mesun kos.

Druwently na su turno a puntra Nivillac dikon e tin ku gaña riba nan, di kual Nivillac hopi disgustá a kana bai i bisa ku e no ta respondé niun pregunta mas.

Hues a  a konkluí e kaso i a bisa ku e lo keda tratá dia 6 di mart den su kontenido.