WILLEMSTAD.- Ministerio Públiko a trata kaso Mulata, Aveo i Edison resientemente den pro-forma.
Ta trata di e kaso di kual 6 venezolano i 5 yu’i Kòrsou ta keda akusá pa poseshon di 24 arma di kandela, mas di 160 bala, plantashon di mariwana i mas di 130 kilo di koka ku mester a yega via un transportashon fo’i Venezuela pa Kòrsou.
Pa ku esakinan OM ta akusá D. Batista Palencia (40), G. Reyes Colina (20), J. Camejo(33), J. Helmes (36), J. Alvarez –Torres(23), O. Rivas Chirino (27), tur nasé na Venezuela, huntu ku J. Gosepa (20) yu, R. Elvira (23) J. Phelipa (30), J. Gosepa (42) tata i K. Ocalia (42) tur nasé na Kòrsou, di tabata pertenesé na e transportashon.
Fiskal a splika ku e kaso a keda posponé pa motibu ku e investigashon no ta kla. Segun fiskal esaki pa motibu ku tin algun desaroyo nobo ku a bin aserka den e investigashonnan. Entre nan e detenshon di e ku e akusado J. Gosepa i Rivas Chirino.
Fiskal a duna di konosé ku for di e kòmbersashonnan ku a keda di tap, polis ta saka afó ku e akusadonan sa tur kos di e kasonan aki te den detaye. Kuantu merkansia a yega i unda nan tabata poné riba e tereno.
Loke tambe a bin nobo den e investigashon segun fiskal, ta ku na momento ku polis a interogá e akusado K. Ocalia dia 2 di yüni último, el a laga sa ku e ta dispuesto na koperá ku e investigashon, pero ku e ta teme pa su bida. Den presensia di su abogado, Ocalia a bisa ku su primu Gosepa a pidié pa tuma tur kos riba dje pero e no tin nada di aber ku e kaso.
El a bisa di a hasi esaki tambe pa laga su tanta den libertat. Fiskal a duna di konosé ku esaki tabata un sorpresa pa OM.
Segun fiskal durante e interogashonnan na hues komisario, por a mira klaramente ku e deklarashonnan di Ocalia tabata basá riba mentira. Riba tur e preguntanan ku tabatin di aber ku por ehèmpel e armanan, Ocaia no por a rospondé nada ku tabata kuadra. P’esei OM ta pensa ku Ocalia no ta responsabel pa armanan ni e droganan. Durante e tratamentu fiskal a bisa ku e ke pa Ocalia skohe pa su mes i stòp di duna deklarashonnan ku no ta kuadra pa tapa pa otro.