WILLEMSTAD.- Kaso “Zonnebloem” awe lo mester a inisiá den korte di promé instansia den oudiensia preliminar.
Pero debí na medidanan di COVID, e lo keda posponé.
E pareha konsistí di L.P.G.C. (hende muhé) di 49 aña di edat i e hòmber C.E.C. di 56 aña di edat, e hòmber A.S.V.I. di 55 aña i e muhé C.O.G. di 46 aña ta esnan ku ta keda sospechá di ta envolví den e kaso aki.
E investigashon “Zonnebloem” ta dirigí su mes riba falsifikashon di dokumento, malversashon di supsidio i labamentu di plaka.
Ta trata di un kaso den kual un trahadó di e instansia di Wit Gele Kruis na aña 2015 lo a hasi denunsia ku e pareha sospechoso lo a kometé froude ku “Jaarrekening” di aña 2014 ku ta suma mas di 700 mil florin. Despues di 2 aña di e denunsia ku ta na aña 2017, OM a kuminsá ku un investigashon den e kaso aki sin keda kla.
Algun siman despues ku e sospechosonan a keda detené, hues komisario a pone tur kuater den libertat, pero bou di kondishon, miéntras e investigashon tabata kana pa e akusadonan por yega den sala di korte i respondé pa loke nan ta keda akusá di dje. Ministerio Públiko no a keda masha kontentu ku e desishon di hues komisario i a apelá e desishon aki kual a keda den “Raadkamer”.
Hues komisario a haña ku interes pèrsonal di e akusadonan tabata pisa mas ku e investigashon aworakí i p’esei a laga nan den libertat pendiente pa tratamentu di e kaso.
Den e veredikto di dia 27 di sèptèmber 2020 korte di apelashon a duna OM rason pa bolbe detené L.P.G.C., C.E.C i A.S.V.I.
Pero despues hues komisario a bai di akuerdo ku e defensa, ku nan interesnan personal ta pisa mas ku e kaso, mirando ku no tabatin interes di investigashon mas pa e momentonan ei i a laga nan den libertat.
Tur e akusadonan a sali bou di kondishonnan i ta keda sospechoso te dia ku e kaso keda tratá.
Remarkabel ta ku e akusado maskulino A.S.V.I a keda kondená na 4 aña den kaso Lacerta, huntu ku otro ko akusadonan pa korupshon na Refineria di Kòrsou (RdK). E akusado tabata den e funshon di hunta di komisario den e organisashon.
Den e veredikto hues a relatá ku nan a hasi nan mes kulpabel dor di pidi un suma grandi bou di mesa pa privilegiá un dje partnernan ku tabata interesá pa operá refineria na Yanüari 2020.
Komo empleado públiko trahadó di RdK, nan a hasi mal uso di nan posishon pa asina favoresé nan propio saku finansieramente, en bes di interesnan di pais Kòrsou i su siudadanonan, segun e veredikto.
E investigashon den e kaso “Zonnebloem” a kuminsá promé ku e kaso Lacerta.
E akusado A.S.V.I. tin 4 aña ku el a keda kondená den korte di promé instansia den kaso Lacerta pero a apelá su sentensia i awor mester bai enfrentá kaso “Zonnebloem”.