Un di e motibunan ku  a kondená akusado na 30 aña

WILLEMSTAD. - Un di e aspektonan ku a hala atenshon ayera den e kondena ku Korte Superior Penal a imponé riba Andrew Oseana (40) di 30 aña prizòn, ta e echo ku e tribunal a remarká ku Andrew tabata “instruktor di shotgun”.

Despues di a keda kondená den Korte di Promé Instansia na 30 aña prizòn, Andrew ta apelá e sentensia bou di e preteksto ku e ta inosente o sea e no sa nada di e kaso di tiroteo.

Pues nunka Andrew a atmití su kulpabilidat di e dòbel asesinato i un biaha intento di asesinato.

E krímen a tuma lugá dia 23 di mei 2018 na kaya Afghanis, pegá ku un barberia. Ora Andrew a yega el a basha bala kaminda ku dos persona di respektivamente 19 i 23 aña di edat a pèrdè nan bida, dor di haña bala den pechu i na kabes i un otro hòmber di 26 aña a keda seriamente heridá, kaminda ku tabata teme pa su bida.

Despues di a mustra riba algun aspekto hurídiko tékniko, e tribunal a konkluí ku ta haña asesinato probá, pero no ku esaki tabata premeditá, pa motibu ku niun kaminda a sali na kla ku Andrew tabatin plan pa a tira e dos víktima nan mata.

File foto

E loke ku si e tribunal ta haña proba, ta intento di asesinato premeditá, pa motibu ku e anochi en kuestion, Andrew tabatin sufisiente tempu pa e pensa kiko e lo a hasi si e no haña su plaka di un arma di kandela ku el a bende e barbero.

E ta saka su shotgun i dirigí esaki riba e tres hòmbernan i lòs tiru. Dos ta keda mortalmente alkansá i e otro ta keda seriamente heridá. E último aki mester a bai Colombia ku urgensia pa skapa su bida. E tabata na rant di a fayesé. El a skapa, pero lo keda semper ku problema serio a konsekuensia di e heridanan ku el a sufri.

E tribunal ta di opinion ku e forma kon e akusado a aktua e dia en kuestion ta laga hopi di deseá. Su aktuashon ta laga komunidat di Kòrsou den un shòk, pero e shòk no ta pa solamente e tres víktimanan, pero e loke ku ta un shòk mas grandi pa komunidat ta ku Andrew tabata un Instruktor profeshonal di Shotgun. Andrew tabata den servisio di un kompania di seguridat kaminda ku su tarea tabata pa kuida bida di hende i nan prosperidat.

Esaki ta motibu ku ounke e tribunal no ta haña dòbel asesinato premeditá probá, tòg ta konkluí e kaso aki ku e kastigu máksimo di 30 aña prizòn, esaki basá riba e loke ku tin ariba skibí.