WILLEMSTAD.- E akusado R. Hansen (20) ayera a presentá den sala di korte akusá pa intento di asesinato.
Segun e akusashon, dia 28 di yüli 2020, el a tira riba e víktima di fam Bart ku a leshoná su skouder i afektá su nèrvionan.
Tambe e ta keda akusá pa poseshon di arma.
Hansen a presentá ayera den sala di korte pa responsabilisá su mes pa su akto.
El a konta ku dia 28 di yüli el a bai yag den mondi i a haña un arma di kandela lorá den un duki.
El a kue e arma i a disidí di bai kas kuné.
Hues a bisa e akusado, ku e ta haña straño, pasó e tabata den un periodo di prueba i e sa ku e no mag di kometé echo kastigabel.
Hansen a bisa ku e no sa kua opshon e tabatin ora el a mira e arma, p’esei el a disidí bai kas kuné. Hues a splika Hansen, ku e por a laga e arma abou bentá òf kue hib’é polis.
Segun Hansen, ora e tabatin e arma na kas, su amigu di fo’i chikí, Bart a bin bishit’é manera semper. Nèt e ora ei e tabata limpia e arma i Bart tabata purba mishi kuné. El a bis’é vários bia pa legumai mishi ku e arma.
Segun e akusado, dado momento Bart lo a ranka e arma fo’i dje i ora el a bai rank’é bèk e arma a tira ku e konsekuensia ku bala a alkansá Bart na su skouder.
Hansen ayera a ninga di a dirigí e arma riba e víktima. El a bisa ku un ratu promé, e víktima a mek e arma riba dje i tabata hari konstantemente.
El a pensa pa kita e arma fo’i dje, pasó e no tabata sa kiko e tabatin den su kabes.
Segun Hansen nunka el a yega wak un arma òf ten’é den su man.
Segun rapòrt médiko, por dura 12 luna promé ku e leshon na skouder di e víktima por rekuperá i ku e por keda ku problema permanente, kaminda e bala a drenta sali.
E víktima a deklará na polis ku kosnan a bai otro di loke e akusado a konta.
El a splika ku nan dos tabata bon amigu fo’i chikí. E tabata úniko amigu ku por a yega na kas di Hansen.
E dia ei ta promé bia ku el a wak Hansen ku un revòlver. Hansen tabata mek e arma kada bes riba dje fo’i ora el a yega.
El a pidié pa no hasié, pero Hansen a keda hasié tòg. Despues Hansen a bai warda e arma i a bolbe bin bèk pafó kuné i a bolbe mek e riba dje.
El a bolbe bisa Hansen pa stòp i a bai para patras di e muraya.
Segun Bart, ora el a bai sinta, Hansen direpente a tira dirigí riba dje. El a kai abou i Hansen no a yud’é, pero a kore bai lag’é.
El a bisa ku e por a mira na Hansen su ekspreshon di kara ku el a hasié intenshonalmente.
Ta manera ku e kier a tir’é den su kabes òf riba dje, segun e víktima. El a bisa ku Hansen tabata mas o ménos 5 meter leu fo’i dje. Hansen a keda ninga di a kometé e akto intenshonalmente.