WILLEMSTAD.- Korte di promé instansia ayera a inisiá tratamentu di e kaso di e akusado Z. Leito (30) akusá di a estafá un total di 15 persona mas di 50 mil florin.

E tabata tuma  sèn for di su víktimanan pa hasi pedido pa kumpra outo na Hapon.

Segun e akusashon, e akusado tabata introdusí su mes riba su página di Facebook komo un persona hopi konfiabel i asta a indiká ku kua negoshi di outo e tabata traha kuné na Hapon ku ta “Be forward in Japan” ku ta bende vehíkulonan stürwil banda kontrali, pa asina konvens’é e klientenan.

Leito ta keda akusá di a kometé e aktonan aki den e periodo di 1e di novèmber 2016 te ku 5 di aprel 2017.

E tabata tuma montantenan entre 3 mil  pa 12 mil florin serka su víktimanan, sin ku nunka nan a haña òf mira e outo personal.

Ayera e akusado a presentá den sala di korte pa responsabilisá su mes pa su akto.

Un kantidat grandi di víktima  tabata presente pa sigui e kaso i tambe hasi petishon di daño perhuisio.

Fiskal a pidi pa posponé e kaso pa motibu ku ainda e investigashon no ta kla i tambe ainda tabata falta 5 persona ku a mèldu nan mes na Ministerio Públiko ku tambe a  bira víktima di e akusado. Esaki a kompletá e total di 15 víktima.

Mirando ku vários di e víktimanan no a hasi petishon òf no sa kon pa hasi e petishon pa daño perhuisio, fiskal a pidi e personal di OM ku ta atendé ku  víktima pa papia ku e víktimanan i splika nan kon pa hasi pedido di daño perhuisio.

E kaso a keda pospon’é pa dia 26 di ougùstùs próksimo di kual fiskal a pidi henter mèrdia pa trata e kaso.

Na final tabata bisto e sistema kon  e víktimanan a keda wak e akusado ku niun momento so no a bira wak den públiko, na momento ku e tabata bandoná e sala di korte. E agentenan di LBD mester a guia e akusado pa sak’é pafó mirando ku aparentemente tabatin vários menasa den su direkshon.