El a bisa ku tin dia e no tin nada di kome

WILLEMSTAD.- Un akusado femenino ku a presentá dilanti hues, pa responsabilisá su mes pa a trata di pasa ku 840 gram di koka den su tas di man, rumbo pa Amsterdam.

E akusado a atmití su kulpabilidat i a bisa ku el a hasié pa nesesidat. El a splika ku e no por haña trabou i tin dia e no tin nada di kome.

Segun e akusado, e no tin yudansa di niun hende pa e i su famia kome i kubri su gastunan básiko.

P’esei el a disidí di aseptá e oferta ku a presentá, pa e por haña un tiki sèn pa kubri algun gastu i kumpra kuminda.

Fiskal a duna di konos’é ku no ta promé bia ku e akusado aki ta kai pa droga.

Na aña 2013, el a keda kondená na un kastigu kondishonal, pa pasamentu di droga.

Mirando tur esakinan fiskal a haña ku e akusashon por keda probá i a demandá e akusado na 18 luna prizòn di kual 6 luna kondishonal.

E akusado no tabatin abogado, pa motibu ku e no tabata sa e prosedura pa yega na un abogado pro-deo.

Den su último palabra e akusado a puntra hues, si por tin un otro tipo di kastigu na lugá di bai prizòn.

Hues ku mester a tuma un desishon a bisa e akusado, ku e no por evitá ku e ta kai será, pa motibu ku e ta ser konsiderá komo residivista.

Mirando esaki, hues a bisa di ta bai kompletamente di akuerdo ku e demanda di fiskal i banda di e kastigu aki, e akusado tin ku sigui guia di Reclassering, pa yud’é yega na un trabou i evitá ku e ta sigui kai será.