WILLEMSTAD,- E akusado femenino R.S., a keda akusá di a trata na eksportá un kantidat di 635 gram di koka pa Hulanda, den dos bòter di “produktonan di kabei”.
Segun e prosèsverbal di duana, na momento ku nan tabata kontrolá den e maleta di e akusado, nan a dal den e dos bòternan, ku tabata mas pisá ku normal.
Esaki a pone ku e personal a bai kontrolá e bòternan mas profundo, pa wak e motibu ku nan tabata asina pisá.
Na momento ku nan a habri e bòternan, a bin haña e droga ku a keda kombertí den líkido.
E akusado a splika, ku el a konosé un hòmber, ku despues di tabata papia algun dia ku otro, a kont’e su situashon finansiero.
E hòmber a bis’e pa nan drenta ku otro pa e yud’e , pero el a ninga na promé instante.
Durante dianan, e hòmber a logra konvensé pa transportá un tiki droga pe i e lo pag’e pa su trabou.
Na prinsipio el a bisa no , pero mirando e situashon finansiero ku e tabata aden, el a disidí di aseptá e oferta.
El a konta ku e hòmber mes a kumpra e ticket pe i hinka e bòternan den su ekipahe di man .
E akusado a bisa ku e hòmber a bis’e ku ta solamente 200 gram lo e bai kuné.
Segun e akusado, despues ku el a kai, nunka mas el a tende di e hòmber.
Tampoko e no a haña niun depchi .
Fiskal a haña e akusashon probá i a bisa ku e ta haña straño, ku e akusado no a sinti ku e bòternan tabata mas pisá ku normal.
Segun fiskal, e ta tene kuenta ku akusado ta “first offender” i ku su situashon personal. Tambe e ta tene kuenta ku e droga tabata na líkido i ku 40 % mester wòrdu kita afó.
Fiskal ta haña ku e akusado tabata hopi habrí i pasa man na su kurason. Mirando esakinan fiskal ta demand’é na 6 luna kondishonal, mas 3 aña di prueba i 240 ora di trabou pa komunidat.
Hues den su veredikto a bisa ku e ta kere loke e akusado a deklará i ta dun’e un chèns. Mirando esakinan hues a bai kompletamente di akuerdo ku fiskal.