WILLEMSTAD.- E akusado femenino di nashonalidat kolombiano, ku a hinka su pareha den pechu Pasku mainta 2020, a wòrdu deportá fin di siman.
Aña pasá Pasku mainta trempan a registrá un kaso di hinkamentu entre un pareha kolombiano, kaminda e muhé a hinka e hòmber.
Alrededor di sinku pa 7 shete di mainta, un hòmber a yega warda polis Rio Canario ku un hinká na altura di e parti robes di su pechu.
Segun polis, e hòmber ku tambe ta ilegal tabata kompañá pa un otro hòmber na su yegada na warda di polis.
E víktima a deklará ku un ratu promé, un dama lo mester a hink’é na un adrès na Bonam.
Miéntras ku a pidi ambulans na warda pa transportá e víktima pa sala di emergensia di C.M.C., un unidat a bai ku e testigu na e adrès na Bonam, unda e hinkamentu a tuma lugá.
Na nan yegada na e kas den kaya Rafael Hansen, no a topa ku e sospechoso, pero e unidat a konstatá vários mancha di sanger.
Alrededor di dies pa ocho di mainta, e dama sospechoso E.P.L.G. di 29 aña di edat nasé na Colombia a regresá na e sitio i a wòrdu detené dor di polis ku tabata hasiendo investigashon einan.
E víktima no a hasi denunsia i polis no por lokalis’é mas tampoko.
Fin di siman ku a pasa e sospechoso a keda deportá pa su pais. Na Mart binidero e kaso lo wòrdu presentá den korte di promé instansia.