WILLEMSTAD.- Ketu bai mas di e damanan ta laga nan mes wòrdu uzá pa trafiká droga.
Durante kasonan di mula e akusado femenino M.S (26) ta keda akusá di kier a transportá un kantidat di 687 gram di koka den su ekipahe.
El a purba hasi esaki na momento ku e tabata bayendo Hulanda.
El a deklará na polis i korte ku el a bin fo’i Hulanda pa motibu ku e tabatin basta problema relashonal i tambe vários debe.
Esei a pon’é bin purba biba na Kòrsou pa wak si e por haña un trabou i sigui biba su bida.
E akusado a konta ku el a baha serka su mama, pero e mama a pèrdè trabou despues ku e tabata tei.
El a splika ku fo’i dia el a bin Kòrsou el a kuminsá buska trabou na vários establesimentu, pakus i kompania nan, skibi su nòmber na uitzendbureau te kansa, sin mira niun resultado.
Mirando e situashon na kas i ku e no tabata hañando trabou, desesperashon a drent’e i a opta pa bai pasa droga pa un deskonosí ku un konosí a hib’e serka dje.
Fiskal a haña e akusashon probá i ta demandá e akusado na 6 luna di kual 3 kondishonal.
El a atmití su kulpa.
Hues den su desishon a bai di akuerdo ku fiskal su demanda.