WILLEMSTAD.- Durante tratamentu di kasonan di mula, mama di 4 yu menor di edat a hasi un supliká na hues pa no mand’é prizòn, pa motibu ku e ta esun ku tin ku kria su yunan i tambe ku e ta disponé di un trabou.

E akusado a presentá den sala di korte, despues ku el a keda kondená na 24 luna di kual 6 kondishonal  den korte anterior.

Ministerio Públiko ta akus’é di kier a transportá 1075 gram di koka.

E kaso a keda tratá dia 5 di febrüari último den su ousensia.

Segun e akusado ta te den aprel el a haña e veredikto  i a apelá su sentensia pa motibu ku e no ta di akuerdo ku e kastigu.

E akusado a splika ku ta via facebook el a haña e maleta serka un hende i ku e no tabata sa ku e maleta tabata  yená ku droga.

Segun e akusado e kier a bai Ulanda pa bai sosegá su kurpa serka un tio.

Hues de Kort a bisa ku esaki ta straño, pa motibu ku e akusado tabata biaha ku Air Berlin e dia ei rumbo pa Düsseldorf.

Segun hues mas aleu na polis e akusado mes a deklará ku e lo a bai keda na hotèl Burnham na Alemania.

Riba esaki e akusado a bisa ku e mes a kumpra su pasashi pa bai sosegá su kurpa serka su tio.

Hues a indiká na  e akusado ku e no ta konfia mas loke el a bisa, pa motibu ku el a kambia loke el a deklará na polis.

Hues a tene konsiderashon tòg un poko ku e akusado su situashon personal i a redusí e kastigu na 18 luna di kual 6 kondishonal.

Pues e akusado femenino tin ku bai sinta un aña di kastigu den prizòn.

E tin 14 dia pa apelá su sentensia.