WILLEMSTAD.- E hòmbernan Sjantiene Ersilia, Faridt Perez Cervera i Robert Chapman a presentá dilanti hues pa tende nan kondena.
Algun siman pasá, Chapman i Ersilia ta esnan ku a kue otro ku sla den sala di korte, despues ku Ersilia tabata akusá Chapman di a tira atrako huntu kuné. Ersilia a ninga ku Perez Cervera tabata den e atrakonan, despues ku e mes a inkriminá nan tur den e aktonan.
Tur 3 a keda akusá di a kometé un atrako armá dia 1e di mart último riba un hòmber di 88 aña na altura di Kortijn, kaminda nan a bai ku un kadena di oro i su medalion.
Nan a kana bai riba e vehíkulo kaminda e víktima tabata sintá i bou di menasa ku arma i kara tapá nan a ranka su kadena di oro i e medalion kore bai kuné.
Pa loke ta trata e di dos atrako, nan ta keda akusá di a drenta den Everlasting Beauty Salon dia 15 di febrüari último kara tapá, armá i ku violensia.
Nan a bai ku 500 pa 4500 florin na tur fo’i vários kliente.
Nan a pone kuchú na e doño su garganta i obligá tur kliente duna nan pertenensia bou di menasa di arma.
Durante konfrontashon di foto, e víktimanan a rekonosé Perez Cervera komo un di e akusadonan.
Chapman i Perez Cervera a bisa ku nan ta inosente i no tin nada di aber ku e kasonan.
Hues a revelá ku Ersilia a atmití tur kos na polis.
El a atmití su kulpa i a bisa di a kometé ámbos atrako huntu ku Chapman i Perez Cervera.
El a bisa ku e tabata e hòmber kabei rasta ku a drenta den e kapsalòn, miéntras Chapman tabata esun kara tapá ku e shirt blanku na su kabes i Perez Cervera esun ku tabata tuma e pertenensianan.
Pa loke ta trata e atrako riba e víktima di edat avansá, señora di e víktima a para mira tur kos i a rekonosé Perez Cervera komo un di esnan ku a atraká su esposo.
Na momento ku polis a tene un entrada hudisial na kas di Chapman, nan a haña vários pertenensia di e víktimanan ku a keda atraká den e kapsalòn, den su kurá bentá. Chapman a bisa ku e no sa kon bin e pertenensianan a yega den su kurá.
Durante tratamentu di e kaso, Ersilia a kambia su deklarashon kompletamente dor di trata na protehá Perez Cervera.
El a bisa e ku Chapman ta esnan ku a kometé e atrakonan i Perez Cervera ta inosente.
Fiskal durante su rekisitorio a bisa di no ta kere ku direpente Perez Cervera ta inosente. Fiskal a haña tur kulpabel i a demandá nan na 9 aña di kastigu. Despues di a deliberá, hues Snitker a bisa den su veredikto ku no tin sufisiente prueba ku Chapman i Perez Cervera a kometé e atrako na kapsalòn. Segun hues e víktimanan a rekonosé Cervera den korant, despues di mas ku 1 luna ku e atrako a sosodé. Esei no ta proba ku e ta esun ku a kometé e atrako, òf ta pasó nan a mir’é den korant. Pa loke ta trata Chapman, hues a bisa apesar ku a haña algun pertenensia di e víktimanan den su kurá no ta sufisiente prueba ku e ta esun ku a kometé e akto. Kisas ta posibel ku otronan por a pasa tira e pertenensianan den su kurá. Pa ku e atrako di e hòmber di edat, tampoko hues no a hañ’é kulpabel. Perez Cervera si hues a haña kulpabel den e atrako di e hòmber di edat, mirando ku esposa di e víktima a rekonosé ora el a kita e maskará fo’i su wowo. Mirando tur esakinan hues a deklará Chapman liber di tur kulpa, miéntras Perez Cervera a keda kondená na 3 aña i Ersila na 7 aña.