Despues di kasi 4 aña ta logra trese Kòrsou despues ku Interpol a lokalis’é

WILLEMSTAD.- E akusado venezolano M. Garcia (29) ku tabata buská pa hustisia den e kaso asesinato, kaminda nan a dera e komersiante Angel Barrio Rodriguez bibu na Choloma den un buraku, su kaso a keda trata den oudiensia preliminar ayera. Ta trata di e kaso  ku a haña e nòmber “Bari”. Garcia ta keda akusá komo esun ku koba e buraku ku ‘loader’ pa tira e komersiante aden bibu ku su mannan mara.

E akto kruel aki, a tuma lugá den e periodo di 8 di febrüari pa 30 di mart 2020.

Banda di esaki e ta keda akusá di ta kómplise di robo di e komersiante i tambe pa poseshon di arma kandela. Despues di kasi 4 aña a logra trese Garcia Kòrsou, despues ku el a logra hui fo’i nos isla.

Dia ku polis a hasi detenshon di e grupo grandi di e akusadonan ku ya a keda sentensiá, Garcia tambe tabata tei, pero despues a logra hui.

E akusado prinsipal M. Ordoñez  ku tabata esun ku a bin ku e plan pa sekuestrá,  atraká i despues asesiná  su doño di trabou ku ta e komersiante i ku ta esun ku a inkriminá tur e akusadonan den e kaso aki, a bisa ku ta Garcia ta esun ku a koba e buraku pa benta e kurpa aden.

Esei a pone ku Ministerio Públiko a hasi un petishon na Interpol pa lokalisá e akusado ku a resultá di tabata na Costa Rica. Despues di  basta trámite i prosedura a logra trese Garcia Kòrsou na desèmber último. Promé ku e akusado a bai Costa Rica, e tabata na Venezuela kaminda el a keda interogá pa un notario.

Fiskal a bisa ayera ku nan ta dispone di tur detaye di e deklarashonnan. Ayera durante di e kaso ku a keda trata den oudiensia preliminar, e akusado su abogado a pidi pa haña e imágennan di rekonstrukshon ku a keda hasí den e kaso aki i tambe e prosèsverbalnan.

Banda di esaki e abogado a pidi pa skucha un testigu ku nan ta yama ‘Yenge”.  Segun e akusado, Yenge a kont’e ku  Ordoñez a bisa nan pa tira tur kulpa riba dje.

El a konta ku dia nan a keda detené, e tabata den sel ku Ordoñez i dado momento a surgi  un problema serio entre nan dos i ku nan mester a kambi’e di sel. Despues di esei Ordoñez a bira kontra dje i kuminsá kulp’e. P’esei e ke pa Yenge testiguá kon Ordoñez a bis’e pa nan tira kulpa riba dje. Garcia a bisa ayera siembargo ku e no tabata sa di nada. E tabata drumi den e finka e dia ei, ora ku e hòmbernan a kore yega serka dje i oblig’e pa koba e buraku.

Pero wes a bisa ku na Kòrsou el a deklará ku nan a oblig’e koba un buraku i el a mira nan tira algu blanku den e buraku, pero ku e no tabata sa ta kiko presis. Pero segun wes, na Venezuela e akusado a deklará otro kos. El a bisa ku despues ku el a kaba di koba e buraku, el a mira un hòmber lorá den paña pa despues nan benta esaki den e buraku.

Fiskal na su turno a pidi wes pa rechasá e petishon pa skucha Yenge. Segun fiskal Yenge a deklará na 2020 huntu ku un otro ko akusado, Montilon, tabatin kontakto ku Ordonez ku a bis’e di a paga Garcia pa e koba e buraku i dera e komersiante aki. Despues ku e akto a bira konosí, Garcia a bandoná pais.

Wes ku mester a tuma un desishon, a bisa ku e ta bai di akuerdo pa rechasá e petishon pa skucha Yenge, pa motibu ku e petishon no ta sufisientemente bon motivá. Pa loke ta trata e imágen di rekonstrukshon, si wes ta bai di akuerdo pa e akusado haña esakinan. Finalmente e kaso a keda posponé  pa dia 26 di aprel  mainta.  E kaso “Bari”  mes ta pendiente pa keda trata den korte di apelashon.