WILLEMSTAD.- Ayera a trata kaso di  E. Fransisca (57), via konferensia di video. Fransisca ta keda akusá pa transportashon di droga, preparashon di droga i  menasa ku morto  den e periodo di desèmber 2018 te ku 30 sèptèmber 2019 dor di laga su pareha di fam Provacia buska mula i instruí nan pa guli òf hinka kondon yená ku koka den nan parti íntimo pa hiba Hulanda. Tambe e ta keda akusá di a sòru pa transportashon di  píldoranan di MDEA.

Mas aleu e ta  keda akusá di a sòru pa transportashon di koka, mariwana, heroina  den e mesun periodo  menshoná, dor di obligá un víktima femenino di fam N. pa para komo mula i hasi e trabou. El a keda yam’é na telefòn na vários okashon i menas’é ku morto bisando, ku si e no kumpli,  e lo hasi su famianan daño.

Abogado Eustatius ku a hiba defensa pa Fransisca, a bisa ayera ku henter e kaso aki ta drai a base di redashi, chantage i yalusí.  Fransisca na su turno a bisa ku tin hopi gañamentu den e kaso aki.

El a insistí ku loke N. ta papia, no ta kuadra apsolutamente ku e bèrdat. Segun e akusado, e hamas a instruí hende pa guli bolita òf hinka kondon yena ku koka den nan parti íntimo.

Fiskal a bisa, ku den telefòn di Fransisca tabatin kombersashonnan solamente di droga i mas droga.  Segun fiskal, e kaso tin algun kos ku mester haña klarifikashon, p’esei e ta bai di akuerdo pa skucha algun testigu. Fransisca i su pareha a haña tempu sufisiente pa nan por sera sèn pa bin Kòrsou pa responsabilisá nan mes pa nan akto.

Hues a bai di akuerdo ku fiskal, pa posponé e kaso te ku yüni 2022.