WILLEMSTAD.- E akusado R.L. (39) a keda kondená na 9 luna di prizòn kompletamente kondishonal, ku un periodo di prueba di 3 aña pa pòstmentu di droga.
E ta keda akusá di a trata na pòst un kantidat di 109 gram di koka pa Hulanda den un pakete. E akusado no a presentá den sala di korte.
Fiskal a pidi hues pa dal bai ku tratamentu di e kaso, pa motibu ku el a haña su dagfar den su man.
E akusado a deklará na polis, ku el a haña e pakete serka un konosí di dje pa hasié un fabor komo esaki su sédula a kaduká.
Segun e akusado, e konosé e persona ya pa algun tempu kaba i el a pensa semper ku e no ta un hende ku ta atendé ku tipo di kosnan asin’ei. Nunka el a pensa ku e persona lo a lag’e hasi algu asina.
Segun e akusado, e konosí a pidié pòst e pakete pe, debí ku su sédula a kaduká netamente den e dianan ei. E no a mira un problema i a bai di akuerdo pa pòst e pakete. Ora ku a haña droga den e pakete, el a keda sorprendí i no por a kere.
Fiskal a haña e akusashon legal i konvinsentemente probá. Fiskal a bisa ku e fenómeno di hasi e hende un fabor, paso su identifikashon a kaduká, ta masha remarkabel.
Segun fiskal, esaki ta un rísiko ku un persona ta tuma riba su mes, dor di hasi e tipo di fabornan aki, ku tur e konsekuensia ku e por trese kuné. Fiskal a bisa ku e ta konvensí ku e akusado a pòst e pakete konsientemente i no ta kere su historia.
Mirando esaki, fiskal ta hasi un demanda di 9 luna kondishonal teniendo kuenta ku e kantidat di droga, mas un periodo di prueba di 3 aña. Hues den su desishon, no a mira motibu pa desviá i ta bai di akuerdo ku e demanda di fiskal.