WILLEMSTAD.- E akusado C.C. no por a splika dikon su aktonan di “stalk” dos damita a yega asina leu. Ayera el a pidi mama di un dje damitanan i e otro damita sòri pa loke el a hasi.

C.C. ta keda akusá di a “stalk” i menasa dos damita riba ret sosial, poseshon di munishon di bala pa arma di kandela, “stalk’ un dje damitanan indikando di lo wak’e na su kas, skol, el a destruí nan outo, e akusado a kousa insendio na kas di un damitanan.

E damitanan no konosé e akusado. Nunka nan a yega di wak’e.

Manera a detené C.C., el a atmití e akusashon na polis i a bisa di ta para responsabel pa su aktonan. Wes a indiká ku e kaso aki ta hopi grave, pasombra dos aña pasa, ora e akusado tabatin 18 aña el a “stalk” dos damita mas yòn kuné via di ret sosial. Mas aleu wes a bisa ku hopi biaha ta bisa ta trese kaso hopi lihé korte, pero si e kaso keda den lachi tambe ta bon. Pasombra asina sa ki efekto e kaso aki tin riba e víktimanan i tambe si e akusado a stòp ku su aktonan.

Mama di un dje damitanan víktima a konta ku e mester a saka e yu for di Kòrsou mand’e Hulanda. Nan a sufri bastante pasombra nan no tabata sa ta ken. E akusado tabata pasa mei anochi tira nan kas ku piedra, nan no por a kana trankil, anochi nan no por a drumi, nan a pone alarma, kámara, pone seguridat dilanti nan porta di kas. Nan no tabata tribi di sali nan kas di miedu. Awor ku e yu ta na Hulanda, e yu tin miedu di kana su so riba kaya. P’esei e ta yama su mama pa papia kuné te ora e ta den su kas.

E otro damita ku si tabata den korte, su tata a bisa ku un dado momentu e yu a bai fo’i kas bai biba serka un amiga. Serka e amiga tambe e no tabata sintié sigur. Kada bochincha òf kachó waf, e yu tabata spanta. Hasta ora e yu ta serka amiga, e akusado a sigui menas’é. E tata a bisa di no ta kere den polis. Polis no a kere nan. E tin sigur ku su kurpa di 2 meter si e lo a topa e akusado, esaki lo a mira. E tata ta lamentá ku despues di 2 aña di no a tende nada di polis, awor e kaso ta bin korte, i esaki ta bolbe lanta tur e sentimentu i emoshonnan serka nan atrobe.

Un dado momentu wes a puntra e akusado si e ta dispuesto na pidi e víktimanan despensa. E akusado a lanta para, wak den direkshon dje víktimanan ku tabata hopi emoshoná. Ta pa promé biaha ku e  víktimanan ta wak’e. Nan no tabata konosé. E akusado a pidi e víktimanan despensa, pasombra loke nan a pasa den no ta dushi. Si e lo por a bai bek, e lo no a hasi tal akto asina. El a bisa nan ku e no ta e hende ei mas... ta kos di pasado i ku e no ta hasi e kosnan aki mas.

E akusado ta bayendo skol i tambe ta traha. El a pidi wes un di dos chèns pa e demostrá ku e por keda riba e bon kaminda.

E akusado a keda kondena na 6 luna di prizòn kondishonal i e mester traha 240 ora di trabou grátis pa komunidat i guia di Reclassering i pago di daño na e víktimanan di 4883 florin.