WILLEMSTAD.- Ruwensly Pisas (23) tabata den sala di korte e simas tras di lomba dilanti e tribunal di korte di apelashon, akusá pa 6 atrako inkluso e atrako ku morto di e komersiante hulandes Ronaldus Wilhelmus Molenaars.
Molenaars a keda asesiná den su apartamentu dia 7 di mei 2019 na Schelpwijk. Ministerio Públiko a akusá e rumannan Jonathan (23) i Richendrick(20) Hansen tambe Ruwensly Pisas pa e krímen aki.
Pisas a keda kondená na 18 aña den korte di promé instansia i a apelá su sentensia.
Pisas ta será na Hulanda i a bin Kòrsou pa tratamentu di e kaso. El a atmití di a kometé vários atrako, pero a ninga di ta esun ku a tira e komersiante mata.
Pisas a bisa ayera ku el a bin Kòrsou pa aklará e deklarashonnan i bisa kiko a sosodé. P’esei el a pidi protekshon i mand’é Hulanda. El a bisa e kier a papia bèrdat i p’esei tabatin mester di protekshon pa e papia.
Segun Pisas, ora ku e rumannan a drenta bèk den outo i a kuminsá diskutí, e por a saka afó ku Jonathan a hinka su man den e hèkwèrk i tira e víktima. El a bisa ku e mes no a mira ku si wowo pero a saka su konklushon ora e rumannan a kuminsá pleita.
E ta lamentá ku un hende a pèrdè su bida pòrnada, p’esei e kier a aklará loke a pasa.
Pisas a bisa e no ta esun ku a tira pero e ta arepentí di a partisipá den e atrako.
El a pidi e famia despensa pa loke a pasa.
Segun e rapòrtnan profeshonal mirando e bida ku e akusado mester a enfrentá sin su mayornan esaki sigur ta pone ku el bai den mal kaminda i a skohe amigunan robes pa atendé kuné
Abogado general a haña e akusashonnan di Pisas probá i a hasi demanda di 18 aña meskos ku e kondena di korte di promé instansia.
Aki 3 siman korte di apelashon lo dikta sentensia.