Nengando tur akusashon di sa algu di koka konfiská

WILLEMSTAD. - Un hòmber di 46 aña di edat a nenga te den tur tono ku e sa algu di kokaina ku a haña riba dos mula ora ku a yega Hulanda for di Kòrsou. Pero e sirkunstansianan tabata di tal forma ku imposibel e hòmber aki lo por a skapa un kondena. Siman pasá Korte na Haarlem a dikta sentensia.

Tur kos a kuminsá ku konfiskashon di droga den outo di e akusado i despues den un apartamentu na Tilburg.

E akusado durante tratamentu di e kaso, a deklará ku e tabata na Kòrsou pa 12 dia den luna di sèptèmber den aña 2020. Durante su estadia aki na Kòrsou el a topa un hende i na un momentu dado, el a fia e hende aki su telefòn ku ta kaba ku e sifranan 4742. El a fia e persona aki su telefòn na mas ku un okashon.

Pues tur e app nan ku a keda mandá den e periodo en kuestion e akusado ta bisa ku no ta su persona a manda esakinan. Tampoko e fotonan ku a keda saká e akusado ta bisa ku e no ta responsabel pa eseinan tampoko.

Ironia ta ku e akusado no por bisa ken el a fia e telefòn ni kuantu biaha el a fia su telefòn na e persona en kuestion. Ora el a yega Hulanda e no a fia su telefòn na niun hende mas.

Mas ku klaro Korte no ta konfia e deklarashon di e akusado ku e no sa ken el a fia e telefòn, ni kuantu biaha el e a fia e persona deskonosí e telefòn.

Polis ku a sigui e hendenan aki a sorprendé nan den un apartamentu na Tilburg i e telefòn konfiská di e mulanan, a topa ku kombersashonnan ku entre di e mula i e telefòn di e akusado.

Tabatin un interkambio intensivo entre di e mulanan i e akusado. Investigashon realisá, ta indiká ku e akusado tabata riba e mesun avion ku un di e mulanan. Esaki tabata dia 7 di sèptèmber ora ku e avion a sali Kòrsou pa Hulanda. Miéntras semper el a apelá riba su derecho di keda ketu i ora ku Ministerio Públiko a mustr’é riba e echo ku e tambe tabata riba e mesun buelo, el a duna e deklarashonnan ku Korte no ta kere.

Pa loke ta trata e droga konfiská den su outo na Hulanda, e akusado a bisa ku e droga no ta di dje. Riba e dia ei el a duna un hende un left i ta e persona ei lo a laga e saku ku droga aden den su outo. E ora ei el a warda e droga pa e hende.

Korte no ta kere nada di e loke ku e akusado aki a trese dilanti.

Fiskal a pidi un kastigu di 16 luna i korte a kondená e hòmber na un kastigu di 15 luna di prizòn.