WILLEMSTAD.- Ayera korte a trata kaso kompleto di un dje ko-akusadonan den kaso di kandela na Ontvanger di Kòrsou dia 22 ougùstùs 2019. Ta trata dje akusado Rudy Ramirez Medina (1988) nasé na Venezuela, ku ta keda akusá di kómplise dje kandela dia 22 ougùstùs 2019. Tratamentu di e kaso aki a tuma lugá virtual, komo e akusado ta será na Bonaire.
Dia 22 di ougùstùs 2019 algu pasá di 12 or di anochi, komunidat di Kòrsou a keda di shòk ku kandela na Ontvanger. E kandela a surgi na e parti sùit dje edifisio i a destruí kantornan di e promé piso. Na momentu ku e kandela a start, tabatin dos bewaker den e edifisio. E kandela a kuminsá na e sekshon di “Bijzondere Invorderingen”, kual departamento ta atendé ku persekushon di hendenan ku debe belasting riba nos isla. E total i daño na e edifisio ta di 42 mion florin.
Imágennan di vidio ta mustra kon un outo ta kore subi lugá di parker di Ontvanger, serka di un dje bentananan, un hòmber ta baha i ta mira moveshon di zuai, miéntras un di dos hòmber ta baha tira algu i despues e kandela grandi ta surgi.
E kandela a bira grandi debí di tantu papel i inventario dje kantornan p’e lado sùit dje edifisio.
A base di deklarashon di un persona importante, a logra di pone man riba Ramirez dia 31 ougùstùs 2019.
Ramirez a atmití e echo mesora, indikando ku e huntu ku su amigunan Gabriel Cabritas-Rosas (detené na Venezuela) i Leo Chirino Mora a sende Ontvanger na kandela. Ramirez t’esun ku a kibra bentana dje edifisio ku mukel pa despues Leo benta gasolin den e lugá i sendé na kandela. El a sende e kandela riba enkargo di un hòmber Nesli Francillon i su primu tambe Francillon.
Semper Ramirez a pinta su ròl den e kaso aki masha minimal, pero despues ta kambia i tira falta riba Cabritas-Rosas. Sinembargo e ta bisa ku el a aserká e dos otro akusadonan, i a paga kada un 4500 florin for di 14 mil florin ku el a haña serka Francillon pa sende e lugá na kandela. Pues e sobrá 5000 florin a bai p’e. Cabritas-Rosas tesun ku a hòrtá e outo di huida, i Leo a kumpra gasolin. Francillon, riba e dia a pasa kuné dilanti edifisio pa mustra ta kua e mester a sende na kandela.
Tantu hues komo fiskal tabatin un interogatorio si Ramirez tabata sa ku e edifisio ku e mester a kima ta unu di gobièrnu i ta Ontvanger. Ramirez a nenga di ta na altura ku ta trata di edifisio di Ontvanger. Ta ora a detené el a haña sa, segun el a bisa hues ayera. Pero tin deklarashon di un testigu ku a bisa ku el a atvertí e akusado ku e edifisio ku e kier sende na kandela ta di gobièrnu. Ramirez a insistí indikando ku si e tabata sa ku ta edifisio di gobièrnu e lo no a sendé na kandela.
Riba su telefòn a topa ku grabashon kaminda Ramirez i su amigunan tabata bebe i fiesta p’e sendementu di Ontvanger na kandela. Segun hues na Ramirez, bo tabatin hopi alegria. E akusado a nenga ku e tabatin fiesta: “simplemente algun amigu a bini huntu i nos a bebe. No tabatin nada di fiesta”.
E ko-akusado Cabritas-Rosas a deklará primeramente ku e ta kere ku ta Francillon tabata den outo ku Ramirez ora a sende e lugá na kandela. Tambe el a nenga di haña sèn serka Ramirez.