WILLEMSTAD.- E akusado F. Boekhoudt tabatin un relashon violento pa hopi aña ku Deka Arrindel. Esaki tantu su famianan komo famia di Deka a deklará na reshèrshinan. Boekhoudt ta keda akusá ku dia 26 di febrüari 2024 el a hinka Deka mata na su kas i despues konhuntamente ku un tal Pasqual i Kroonstadt a bai tira e kurpa kantu di kaminda na Watamula. Di akuerdo ku wes, den promé instansia ora a konfrontá Boekhoudt ku e kaso akí, el a nenga di tin algu d haber i ku e no konosé Deka. El a bisa ku ta Pasqual a kometé e echo. Dia 6 di desèmber 2024, Boekhoudt dilanti di wes a atmití di a hinka Deka mata pasobra, Deka lo mester a yama hende i bisa e hendenan unda e ta biba, pa bin mat’é. Pasqual a trata di par’é p’e no kometé e echo, pero e no a logra. Na su kas el a lora Deka den un laken i a bai tir’é na Watamula. Sinembargo djaluna último ora a bolbe interogá Boekhoudt riba su deklarashon di 6 di desèmber, e ta desmentí tur akusashon bisando ku ta Pasqual a mata Deka. Boekhoudt a kontestá wes ku el a gaña dia 6 di desèmber 2024 pasobra, durante interogashon na reshèrshinan na yüli 2024, Pasqual mand’é stul, segun Boekhoudt dia 26 di febrüari ora el a yega kas i topa Deka. El a kore ku Deka for di su kas, Deka a habri boka grandi kuné bisando: "mi ke mira un hende saka mi afó". Mirando ku anteriormente Pasqual a bai na kas di Deka, bai a skual e, Boekhoudt a disidí pa yama Pasqual pa bin papia ku Deka i pa sak’é afó. Den pasado Deka a yega di bai ku otro hende kaminda Boekhoudt i Pasqual tabata sinta i e hende a menasá nan. “Awor akí Deka a yama telefòn i a bisa un hende:”bo ta kòrda mi a bisa bo di e hendenan ku no ta kria yu, awèl mi ta serka di nan. Bin kaba ku nan. Deka a duna e hende(nan) su adrès. P’esei el a yama Pasqual pa atendé ku Deka. “Ora Pasqual a yega, mi di kuné ata e loko aya tras, bai atendé kuné”. Nos dos a kuminsá diskutí ku Deka kon e por yama hende pa bin na mi kas pa kaba ku nos. Diripiente Pasqual a saka un kuchú for di su tas i hinka Deka kuné. Ora mi a mira e kos akí, mi a kai den un kataklismo. Deka a kana bin riba mi ku man habri, despues el a kai den baki di mata. Pasqual a bai den su kara, keda wak e pa 2 minüt, kaba bisa mi, ya e ta kla. E ta morto. E forma kon Pasqual a hasi, a duna mi miedu pasó ta manera ku el a yega di mata hende den pasado”, Boekhoudt a deklará. Mas aleu e akusado a bisa ku ora nan a yega Watamula, ta Pasqual a baha e kurpa. Tambe ku ta Pasqual a yama Kroonstadt pa bis’é ku e tin un djòp p’e.
Despues di a skucha historia di Boekhoudt, wes a bis’é e ta otro atrobe. Ademas ta kon Pasqual ku tabatin un tas chikí ta saka un kuchú asina grandi for di dje hinka Deka. Segun Boekhoudt, no a haña e kuchú te pa haña su DNA ariba. Relashoná ku e asuntu di kuchú, Pasqual a bisa ku Boekhoudt a limpia e kuchú i pon’é bèk den kashi di kushina. Tambe wes a mustr’é riba deklarashon di tantu su ruman muhé i wela ku ta bisa ku Boekdhout tabatin un relashon hopi violento ku Deka. Ta kada biaha e ta bati Deka i asta Boekhoudt ta dal su mama i su wela tambe. Boekhoudt lo ta habri boka grandi ku su famianan tambe. Boekhoudt a nenga deklarashon di su wela i ruman muhé. Segun e akusado, nan ta gaña i tambe ku e ruman ta meskos ku Deka, nan ta kana na vários porta (otro hòmber). “Ora mi kore ku Deka, semper e ta keda bini”. Otro punto ku wes a mustra e akusado riba dje ta ku el a yega di traha den e área di Watamula unda a haña kurpa di Deka.